"Microsoft" şirkəti "Zero Day Quest" adlı ilk genişmiqyaslı informasiya təhlükəsizliyi tədbiri çərçivəsində kibertəhlükəsizlik üzrə mütəxəssislərinə - "ağ hakerlər"ə - ümumilikdə 1,6 milyon ABŞ dollarından çox mükafat verib.

Valyuta.az xəbər verir ki, bu barədə məlumat şirkətin rəsmi saytında yer alıb.

Tədbir zamanı iştirakçılar "Microsoft"un bulud və süni intellekt xidmətlərində 600-dən çox təhlükəsizlik zəifliyi aşkarlayıblar. Təxminən 100 tədqiqatçının qatıldığı tədbirdə maarifləndirici sessiyalar da keçirilib.

Proqram çərçivəsində:

* Süni intellekt xidmətlərində zəiflik axtarışı "AI Red Team" komandası ilə birlikdə aparılıb;
* SSRF (server-side request forgery) hücumlarına qarşı müdafiə yolları mühəndislərlə birgə öyrənilib;
* Bug Bounty (səhv tapma və mükafatlandırma) üzrə mütəxəssislərdən tövsiyələr təqdim olunub.

"Microsoft" gələcəkdə bu cür tədbirləri daha da genişləndirməyi planlaşdırır. Şirkət mükafatların artırılacağını, yeni tədqiqat tapşırıqlarının təqdim ediləcəyini və məhsul inkişaf etdiriciləri ilə kibertəhlükəsizlik mütəxəssisləri arasında daha sıx əməkdaşlığın qurulacağını açıqlayıb.

"Ağ haker" kimdir?

"Ağ hakerlər" - kiberhücum bacarıqlarını qanun və etik qaydalar çərçivəsində sistemlərin və məlumatların qorunmasına yönəldən mütəxəssislərdir. Onlar təhlükəsizlik zəifliklərini aşkarlayaraq şirkətlərə risklərin qarşısını almaqda kömək edirlər. Bu baxımdan onlar "qara hakerlər"dən fərqlənir və informasiya təhlükəsizliyinin qorunmasında mühüm rol oynayırlar.