Daşınmaz əmlak bazarında qiymətlərin kəskin düşməsi qaçılmazdır.

Bunu BakiPost.az-a açıqlamasında iqtisadçı ekspert Əkrəm Həsənov deyib.

Onun sözlərinə görə, uzağı 2 ilə bu proses baş verəcək:"Çünki daşınmaz əmlakın qiyməti bizdə çox şişirdilmişdi. Son 15 ildə qiymət azı 10 dəfə artıb. Səbəb də neft gəlirləri hesabına dollar kütləsinin ölkədə artmasıdır. Pul çox olanda qiymət də artır. Amma bu, süni qiymət artımıdır. İndi isə əks proses gedir. Dollar kütləsi azala-azala gedir, çünki valyuta gəlirlərimiz azalır və azalacaq da”.

Əkrəm Həsənov bildirib ki, əslində ölkəmizdə real bazar iqtisadiyyatı olsaydı, daşınmaz əmlak bazarı çökərdi: "Sadəcə bir tərəfdən, dövlətin müəyyən dəstəyi, digər tərəfdən isə insanlarımızın psixoloji baryerləri aşa bilməməsi prosesi ləngidir. Məsələn, yanıma adam gəlir və deyir ki, müəllim, 300 000 kreditim var, təminat kimi daşınmaz əmlakımı girov qoymuşam. Soruşuram ki, qiyməti nə qədərdir? Deyir 1 mln. Deyirəm, sat, borcunu qaytar, canın qurtarsın da. Deyir ki, axı indi camaatda pul yoxdur deyə 500 000 təklif edirlər 1 mln. əvəzinə. Soruşuram ki, 15 il əvvəl qiyməti nə qədər idi həmin obyektik. Deyir ki, heç 100 000 deyildi. Ona deyirəm ki, axı niyə 15 il əvvəlki 100 000 qiymətini ədalətsiz, 2-3 il əvvəlki 1 mln qiymətini ədalətli hesab edirsiz? İnsanlarımız bazar iqtisadiyyatını tam dərk etmir. Bu gün 500 000 qiymətlə alırlarsa, demək, qiyməti də elə budur. Sabah bəlkə 200 000 olacaq, onda nə edəcəksən? Amma insanlarımız psixoloji baryeri aşıb satmaq istəmir ki, borcundan çıxsın. Nəticədə həm borcların səviyyəsi artır, həm də əmlakın qiyməti hələlik düşmür. Amma əvvəl-axır onların hamısı satmalı olacaq, sadəcə onda qiymətlər tam çökəcək”.