Türkiyənin Çanaqqala şəhərində özəl şirkətə məxsus 18 metr uzunluğundakı “Gemini” adlı lüks yaxta Çanaqqala boğazından keçərkən dalğaqırana (port akvatoriyası, dəniz, göl, su hövzələrinin sahilboyu hissəsini külək dalğalarından və axınlardan mühafizə edən hidrotexniki qurğu – red.) çırpılıb.

Lüks yaxtanın ön tərəfinin bir hissəsi dalğaqıranın üzərinə çıxıb. Yaxtanın kapitanı radio vasitəsilə hadisə barədə Çanaqqala Boğazı Gəmi Trafik Xidmətləri İdarəsinə xəbər verib. Boğazdan keçəcək digər gəmilərin kapitanları da qəza barədə məlumatlandırılıblar.

Sahil Mühafizəsi və Çanaqqala Liman İdarəsinin əməkdaşları hadisə yerinə gəliblər.
Bildirilib ki, yaxta kranın köməyi ilə qaldırılacaq və alt hissəsi yoxlanılacaq. Lazımi araşdırma aparıldıqdan sonra səfər edib-etməyəcəyinə qərar veriləcək.

Mənbə: Haber Global