Türkiyədə kəşfiyyat rəsmilərinin Ali Hərbi Şuranın (YAŞ) növbəti iclasından bir neçə ay əvvəl ordunun Baş Qərargahını xəbərdarlıq etdiyi məlum olub.

Avropa.info xəbər verir ki, Baş Qərargaha təqdim olunan hesabatda vəzifə və rütbədə yüksəlməsi gözlənilən polkovnik və generalların üçdə birinin Gülənçi olduğu göstərilib.

Müəyyən olunan adlara bağlı məlumatların olduğu hesabat çərçivəsində qərargahda araşdırma başladılıb. Gülən şəbəkəsinin üzvlərinin Ali Hərbi Şuradan sonra Silahlı Qüvvələrdə təmizlik ediləcəyini anlayınca çevriliş etmək qərarına gəldikləri ehtimal olunur.

Əldə olunan məlumata görə “Ergenekon” istintaqının Gülən camaatının qurduğu oyun olduğu üzə çıxdıqdan sonra Silahlı Qüvvələrin yüksək rütbəli sabitləri Türkiyə kəşfiyyatı tərəfindən izlənməyə başlanıb.

Mart ayında başlanan genişmiqyaslı araşdırma zamanı Ali Hərbi Şurada haqlarında qərar qəbul olunacaq zabitlərin təxminən üçdə birinin Gülən camaatı ilə əlaqəsi olduğu məlum olub. Məhz bundan sonra kəşfiyyat rəsmiləri hazırlanan siyahını Baş Qərargaha göndərib.

Ehtimallara görə Baş Qərargaha təqdim edilən siyahı Gülən şəbəkəsi tərəfindən ələ keçirilib və ordu daxilində təşkilatlanmış Gülən camaatı avqust ayında keçirilməsi planlaşdırılan Ali Hərbi Şurada ciddi güc itkisinə məruz qalacağını düşünərək 15 iyulda çevrilişə cəhd edib.

Kəşfiyyat rəsmiləri çevriliş cəhdindən sonra başladılan istintaq çərçivəsində həbs olunan yüksək rütbəli zabitlərdən təxminən 100-nün sözügedən siyahıdakı adlar olduğunu bildirir.