Gürcüstan vətəndaşı Türkiyədən ölkəsinə qanunsuz yolla rusiyalı qadını keçirmək istəyib.

Oxu.Az-ın IHA agentliyinə istinadən məlumatına görə, gömrükçülər qadını çamadanda aşkarlayıblar.

Hadisə Batumi yaxınlığında Türkiyə-Gürcüstan sərhədinin Sarpi nəzarət-keçid məntəqəsində baş verib. Ağır çamadanı arxasında sürüyən 47 yaşlı kişi gömrük işçilərində şübhə yaradıb. Yoxlama zamanı çamadanın içindən 27 yaşlı Rusiya vətəndaşı Angelina Samusenko çıxıb.

Qeyd edilir ki, Samusenkonun adı cari ilin may ayında Türkiyənin Kəmər şəhərində baş verən qəzada hallanır. İçkili vəziyyətdə sükan arxasında olan rusiyalı qadın Antalyada beş ulduzlu hotellərin birində bağban işləyən altı uşaq atasını avtomobillə vurub öldürüb. Məhkəmənin qərarı ilə Samusenkoya ölkədən çıxış qadağan edilib.