Gərginliyin və terror hadisələrinin hər gün çoxaldığı Türkiyədə bu gecə də sakit keçməyib. ANS PRESS-in yerli mətbuata istinadən verdiyi məlumata görə, ötən gecə Türkiyənin 5 vilayətində PKK terrorçuları təhlükəsizlik qüvvələrinə hücum ediblər.

Diyarbəkirdə terrorçu qrup zirehli polis avtomobilinə minaatanlarla və iriçaplı silahlarla hücum edib. Bu vaxt bir təcili yardım avtomobili atışan tərəflərin arasında qalıb. Terrorçuların minaatandan açdığı atəş partlayışa səbəb olub və ətrafda olan iş yerləri ilə evlərin pəncərə şüşələri sınıb.

Mardinin Nusaybin rayonunda məhəllələrdə terrorçuların qazdığı xəndəkləri traktorlarla doldurmağa gedən polis əməkdaşları PKK-çı bir qrupun silahlı hücumuna məruz qalıblar. Polisin də qarşılıq verməsi ilə tərəflər arasında atışma başlayıb. Atışma zamanı güllə yarası alan mülki vətəndaş xəstəxanaya çatdırılsa da onun həyatını xilas etmək mümkün omayıb.

Siirt vilayətinin Kurtalan rayonunda desant taborunun olduğu hərbi hissə PKK terrorçularının silahlı hücumuna məruz qalıb. Hərbi hissədən açılan cavab atəşi ilə terrorçular qaçaraq uzaqlaşıblar. Hazırda qaçan terrorçuların axtarışı istiqamətində əməliyyatlar davam edir.

Hakkari vilayətinin Şemdinli rayonu polis bölməsi PKK trrorçularının hücumuna məruz qalıb. Növbədə olan polislərin cavab atəşi ilə tərəflər arasında atışma başlayıb. İnsident zamanı insan itkisi olmayıb və qaçan terrorçuların ələ keçirilməsi istiqamətində əməliyyatlar davam edir.

Batman vilayətinin Gercüş ryonundakı çöllük ərazidə təhlükəsizlik qüvvələri ilə terrorçular arasında atışma olub. Daha bir insident isə Gercüşün Esentepe kəndində olub. Atışmanın baş verdiyi bölgəyə əlavə qüvvələr cəlb olunub. İnsident zamanı Gercüş ilə Kayapınar magistralında təhlükəsizlik səbəbilə avtomobillərin hərəkəti məhdudlaşdırılıb.