Gömrük Komitəsinin yeni sədri büdcə ödənişlərini artıra bilməyib - RƏQƏMLƏR
15-06-2019, 19:55
Bu ilin ilk 5 ayında Azərbaycanın xarici ticarət dövriyyəsi 14 milyard 449,2 milyon dollar olub. Yeniavaz.com Dövlət Gömrük Komitəsi tərəfindən açıqlanan məlumatlara istinadən bildirir ki, ötən 5 ay ərzində Komitə tərəfindən toplanan gömrük vergi və rüsumlarının məbləği 1 milyard 733,5 milyon manat (1 milyard 19,7 milyon dollar) olub. Nəticədə toplanan gömrük vergi və rüsumlarının məbləği xarici ticarət dövriyyəsinin 7%-nə bərabər olub. Məlumat üçün qeyd edək ki, ötən ilin ik 5 ayında bu göstərici 6,9% olub. Belə ki, ötən ilin ilk 5 ayında Azərbaycanın xarici ticarət dövriyyəsi 11 milyard 225,9 milyon dollar olub. Komitə tərəfindən toplanan gömrük vergi və rüsumlarının məbləği isə ötən ilin ilk 5 ayında 1 milyard 325,6 milyon manat (780 milyon dollar) olub. Onu da qeyd edək ki, hazırkı sədr Səfər Mehdiyev ötən ilin aprel ayının 24-dən etibarən Komitəyə rəhbərlik etməyə başlayıb. İlin ilk 4 ayında isə Komitəyə rəhbərlik Aydın Əliyev tərəfindən həyata keçirilib.