Neft İxrac Edən Ölkələr Təşkilatının (OPEC) bu il və gələn il üçün qlobal neft tələbi ilə bağlı proqnozunu sabit saxlayıb. Təşkilat bu il qlobal neft tələbinin ötən ilə nisbətən 5,7 milyon barel artaraq gündəlik 96 milyon 440 min barelə çatacağını proqnozlaşdırır.

“Margin.az” xəbər verir ki, bu barədə “OPEC”in aylıq neft bazarı hesabatında qeyd olunub.

Qlobal neft tələbinin gələn il 4 milyon 150 min barel artaraq gündəlik təxminən 100 milyon 590 min barelə çatacağı gözlənilir.

Bildirilib ki, İqtisadi İnkişaf və Əməkdaşlıq Təşkilatı regionunda yanacağa yüksək tələbin olması səbəbilə bu ilin birinci yarısı üçün qlobal neft tələbi proqnozu yüksəldilsə də, bu artım koronavirusa yoluxma sayının artması ilə kompensasiya edilib.