Xəbər verdiyimiz kimi, Milli Məclisin deputatı Fazil Mustafaya qarşı cinayət işi üzrə təqsirləndirilən şəxslərin məhkəməsi başlayıb.

Məhkəmə qarşısında təqsirləndirilən şəxs qismində 5 nəfər çıxarılıb.

Bunlar Emin Əliyarov, Rəşad Əhmədov, Azər Səricanov, Elşad Əsgərov və Səbuhi Şirinovdur.

Gununsesi.info adıçəkilən şəxslərin ittiham aktına istinadən bu cinayətin təfərrüatını öyrənib.

İstintaq araşdırması zamanı məlum olub ki, cinayət İran İnqilab Keşikçiləri Ordusu (SEPAH) tərəfindən sifariş edilib.

Deputata qarşı sui-qəsd cinayəti üçün məsuliyyəti isə üzərinə götürən təqsirləndirilən şəxs Azər Səricanov olub.

Məlum olub ki, dəfələrlə İranın Qum şəhərində olan Azər Səricanov bu ölkənin xüsusi xidmət orqanları ilə iş birliyinə olub.

Fazil Mustafaya qarşı cinayəti boynuna götürən adıçəkilən şəxs bunun müqabilində 30 min ABŞ dolları məbləğində pul alıb.

Qeyd edək ki, ötən ilin martın 28-də Milli Məclisinin deputatı Mustafa Fazil Qəzənfər oğluna yaşadığı evin qarşısında – Bakı şəhəri, Sabunçu rayonu, Zabrat-1 qəsəbəsi, Babək küçəsi ev 2 “Z” ünvanında “Kalaşnikov” konstruksiyalı avtomat silahından atəş açılaraq terror aktı törədilib.

Terror aktı nəticəsində Fazil Mustafa bədənin sağ çiyin qurşağını və sağ budun aşağı üçdə birini dəlib keçən güllə yarası alıb.

Faktla bağlı Azərbaycan Respublikası Dövlət Təhlükəsizliyi Xidmətinin İstintaq baş idarəsində Cinayət Məcəlləsinin 277 (dövlət xadiminin və ya ictimai xadimin xidməti və ya siyasi fəaliyyətinə son qoymaq və ya bu fəaliyyətə görə qisas almaq məqsədilə onun həyatına sui-qəsd etmə) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini, döyüş sursatı əldə etmə, saxlama, daşıma və gəzdirmə) maddələri ilə cinayət işi istintaq olunaraq baxılması üçün Bakı Ağır Cinayətlər Məhkəməsinə göndərilib.