ABŞ-ın Şimal-Qərb Universitetinin alimləri ənənəvi akkumulyatorlara davamlı və bərpaolunan alternativi təmin edən, yerdən elektrik enerjisi istehsal edə bilən inqilabi yanacaq elementi hazırlayıblar.

Torpaq mikrob yanacaq elementi elektrik enerjisi yaratmaq üçün torpaqda olan təbii bakteriyalardan istifadə edir. "Bu mikroblar hər yerdə mövcuddur, onlar torpaqda yaşayırlar. Biz onların elektrik enerjisini yaratmaq üçün çox sadə mühəndislik sistemlərindən istifadə edə bilərik", -deyə Şimal-Qərb Universitetinin mülki və ətraf mühit mühəndisliyi kafedrasının dosenti Corc Uells izah edib.

Elektrik enerjisi istehsal etmək üçün mikroorqanizmlərdən istifadə konsepsiyası yeni deyil. Əslində, ingilis botanik Maykl Kresse Potter 113 il əvvəl mikroorqanizmlərdən uğurla elektrik enerjisi istehsal etmişdir. Ancaq buna baxmayaraq, bu texnologiya praktiki və kommersiya baxımından məqsədəuyğun həll yolu kimi hələ də inkişaf etməyib.

Ən yeni yanacaq elementi quru və nəm şəraitdə sınaqdan keçirilmiş və oxşar texnologiyalardan 120 % üstün olmuşdur. Ondan sınaq üçün torpağın rütubətini ölçən və qrunt təzyiq səviyyələrini təyin edən sensorları gücləndirmək üçün istifadə edilmişdir və geniş tətbiqlər üçün potensialı aşkar edilmişdir. "Əgər biz cihazların işləməsi üçün trilyonlarla batareya ilə gələcəyi təsəvvür etsək, onların hər birini litium, ağır metallar və ekoloji cəhətdən təhlükəli toksinlərlə hazırlaya bilmərik", -deyə alim vurğulayıb.

Yanacaq elementi torpaqda olan üzvi karbona əsaslanır və mikrobları parçalaya bilər, yəni sonsuza qədər, tükənmədən istifadə edilə bilər. Gələcəkdə alimlər bu innovativ texnologiya ilə təchiz edilmiş aşağı gücə malik cihazların mərkəzləşdirilməmiş şəbəkəsini yaratmağı planlaşdırırlar.

Nubar Süleymanova, “İki sahil”