Britaniyalı okeanoqraf Simon Boksoll gəmilərin müəmmalı şəkildə yoxa çıxmasını təbiət hadisəsi kimi izah edib.

Bu barədə "Daily Mail" nəşri yazıb.

Qeyd olunub ki, Simon Boksoll "Bermud üçbucağının sirri" sənədli filmində bununla bağlı öz versiyasını açıqlayıb.

O hesab edir ki, Florida yarımadası, Puerto-Riko və Bermud adaları arasındakı ərazidə 20-30 m hündürlüyündə tənha kabus dalğalara adi haldan daha çox rast gəlinir. Onun sözlərinə görə, hətta nəhəng gəmi belə bu cür dalğa ilə qarşılaşdıqda iki-üç dəqiqəyə suyun dibinə gedəcək.

Misal olaraq Boksoll Birinci Dünya müharibəsi zamanı ABŞ Hərbi Dəniz Qüvvələrinin gəmilərini təchiz edən "Siklop" gəmisini göstərir. 1918-ci ildə gəmi Bermud üçbucağı ərazisində iz qoymadan yoxa çıxıb. Alim hesab edir ki, onu da böyük dalğa batırıb.

Bu fərziyyəni yoxlamaq üçün Simon Boksoll və onun Sauthempton Universitetindən olan həmkarları gəminin miqyaslı modelini qurublar və onun hərəkətlərini araşdırıblar. Təcrübə göstərib ki, düz altlığı və böyük ölçüsü "Siklop"u anormal dalğalar qarşısında xüsusilə həssas edib.