Suriya prezidenti Bəşər Əsəd cari ilin iyul ayında İŞİD terrorçuları tərəfindən qaçırılan, sonra ordunun əməliyyatları nəticəsində azad olan girovlarla görüşüb. FaktXəbər.com-un Al-Watan-a istinadla verdiyi məlumata görə, Prezident onları və ailə üzvlərini təbrik edib. O, bildirib ki, dövlət nəyin bahasına olursa olsun girovları axtarılması və azad edilməsi üçün əlindən gələni edəcək.

Görüş əsnasında xilas olunanların yaxınları sevinclərin bildirmək üçün Bəşər Əsədi çiyinləri üstünə qaldırıb və prezidenti, Suriya hökumətini dəstəkləyən şüarlar səsləndiriblər.

Xatırladaq ki, iyul ayının 25-də İŞİD terror təşkilatı Suveydada druzlara hücum çəkərək 250 nəfəri öldürmüş, 35 nəfəri isə qaçırmışdı. Suriya ordusu mütəmadi əməliyyatlar keçirərək terrorçular tərəfindən qaçırılanları xilas edib. Sonuncu dəfə əməliyyat zamanı 19 druz qadın və uşaq azad edilib.