ABŞ administrasiyasındakı mənbələr jurnalistlərə bildiriblər ki, Ukrayna ilə sərhəddə 190 minə qədər rus əsgəri, o cümlədən qondarma “LXR/DXR” qüvvələri cəmləşib. Rusiya qonşu ölkəyə bütün mövcud tabor taktiki qruplarının təxminən 75%-ni (160-dan 120-si), 50 hava hücumundan müdafiə diviziyasından 35-ni, 550 qırıcı, Su-34 qırıcı-bombardmançı, hücum təyyarələri və bombardmançı təyyarələrini yerləşdirib.

Bizim.Media xəbər verir ki, bu barədə Amerikanın CNN telekanalına mənbə bildirib.

“Ukraynanın yaxın ərazisində qüvvələrin cəmləşməsi olduqca qeyri-adidir. Və bu, bir daha sübut edir ki, Rusiya Ukraynaya hücum etməyə hazırlaşır”, - kəşfiyyat məlumatları ilə tanış olan ABŞ rəsmisi bildirib.


Rəsmi məlumata görə, 120 batalyon taktiki qrupu Ukraynanın dövlət sərhədindən cəmi 60 km aralıda yerləşir. Bu, Rusiya ordusunun bütün şəxsi heyətinin yarısından bir qədər azdır.

Pentaqonun kəşfiyyat məlumatlarına görə, hazırda Ukrayna yaxınlığında cəmləşən Rusiya qüvvələri Ukrayna Silahlı Qüvvələrini xeyli üstələyir.