Ukraynaya hərbi təcavüz məşhurları vətəndən didərgin salıb...

Rusiyanın "Yabloko" partiyasının təsisçisi Qriqori Yavlinski Rusiyanı tərk edib.

Bu barədə "RİA Novosti" agentliyi məlumat yayıb.

Agentlik Moskva hava limanında Yavlinskinin pasport nəzarətindən keçməsini əks etdirən müşahidə kameralarının videoyazısını dərc edib.

"Dünən gecə Dubayda yerdəyişmə ilə siyasətçi Londona uçub", - bunu agentlikdəki mənbə məlumat verib.

Yavlinskinin Rusiyanı həmişəlik, yoxsa müvəqqəti tərk etməsi dəqiqləşdirilir.

Eyni zamanda, "Yabloko" partiyasının mətbuat xidmətində məlumat verilib ki, siyasətçi iki həftəlik məzuniyyətə gedib və məzuniyyəti bitəndən sonra Rusiyaya dönəcək, yəni ölkədən mühacirət etməyi planlaşdırmır.

Əvvəllər xəbər verildiyi kimi, Rusiyanın Ukraynaya hərbi müdaxiləsi başlanandan ölkədən mühacirət edənlərin sayı artıb.

Martın sonlarında Anatoli Çubays Rusiyanı tərk edib, sonradan Türkiyə və İsraildə görünüb.

Aprel ayında Mixail Proxorov İsrailə köçüb.

Rusiyanı həmçinin "Pussi Riot"un iştirakçısı Mariya Alexina, jurnalist Kseniya Sobçak, müğənni Alla Puqaçova, teleaparıcılar Maksim Qalkin, İvan Urqant və Olqa Buzova, aktyorlar Leonid Yarmolnik və Çulpan Xamatova, musiqiçilər Boris Qrebenşikov və Andrey Makareviç və başqaları tərk edib.

Onların bir hissəsi vətənə dönüb, bir hissəsi xaricdə yaşamaqda davam edir.