Mobil tətbiqlər ekosistemində tarazlığı dəyişəcək mühüm bir qərar verilib. "Epic Games" ilə "Google" arasında illərdir davam edən məhkəmə prosesində ABŞ-ın Apellyasiya Məhkəməsi önəmli qərar verib.

Valyuta.az xəbər verir ki, məhkəmə daha əvvəl verilmiş qərarları yerində hesab edərək "Google"ın etirazını rədd edib.

Bu qərarla birlikdə "Google" "Play Store" platformasında üçüncü tərəf tətbiq mağazalarının açıq şəkildə görünməsinə və tam funksional şəkildə işləməsinə icazə verməyə məcbur olacaq. Qaydaların ən azı üç il müddətində qüvvədə qalacağı bildirilib.

"Google"ın ödəniş sistemi məcburiyyəti sona çatır

Artıq tətbiq hazırlayan şirkətlər "Google"ın məcburi ödəniş sistemi ilə məhdudlaşmadan öz alternativ ödəniş infrastrukturunu istifadə edə biləcəklər. Bununla yanaşı, istifadəçilərin "Play Store" xaricindəki yükləmə variantlarına yönləndirilməsi də sərbəst olacaq.

Digər mühüm dəyişiklik isə "Google"ın cihaz istehsalçılarına və mobil operatorlara üçüncü tərəf mağazaları öncədən cihazlara quraşdırmamaları üçün hər hansı imtiyaz təklif etməsinin qadağan edilməsidir.

"Epic Games"in baş direktoru Tim Svini bildirib ki, "Epic Games Store"un "Android" versiyası yaxın vaxtlarda "Google Play"də yer alacaq. Digər tərəfdən, "Google" bu qərarın istifadəçi təhlükəsizliyini riskə ata biləcəyini iddia edərək işi ABŞ-ın Ali Məhkəməsinə daşımağı planlaşdırır. Lakin məhkəmə prosesi davam etsə də, şirkət yeni qaydaları tətbiq etməyə məcburdur.