ABŞ-ın “Raytheon” şirkəti “PhantomStrike” aktiv elektron skanedən antenna (AESA) radarını 2025-ci ilə qədər ixraca hazır etməyi planlaşdırır. Ordu.az “Janes” nəşrinə istinadən xəbər verir ki, bu barədə şirkət nümayəndələri Britaniyada keçirilən “Farnborough 2022” beynəlxalq aviasiya sərgisində məlumat verib.

“Raytheon Intelligence & Space” şirkətinin prezidenti Erik Ditmars bildirib ki, şirkət 2025-ci ilə qədər radarı ixrac etmək niyyətindədir və sistemi 2023-cü ilin sonu və ya 2024-cü ilin əvvəli xüsusi platformalara inteqrasiya etməyi planlaşdırır.

Ditmars bildirib ki, “PhantomStrike” AESA radarları yüngül hücum təyyarələri, fırlanan qanadlı təyyarələr, Pilotsuz Uçuş Aparatları (PUA) və stasionar platformalar üçün nəzərdə tutulmuş yığcam, kiçik ölçülü platformadır.

İki ölçüdə mövcuddur. Kiçik ölçülü radarın çəkisi təxminən 45 kq, orta ölçülü radarın çəkisi isə təxminən 54 kq-dır.