Musavat.com xəbər verir ki, Ukrayna Prezidenti Volodimir Zelenski Avropa İttifaqı ölkələrinə və digər Avropa müttəfiqlərinə müraciət edərək ABŞ prezidenti Donald Trampın Rusiya ilə sülh razılaşması çərçivəsində “ərazi mübadiləsi” planına qarşı birgə mövqe nümayiş etdirməyə çağırıb.

Financial Times yazır ki, Zelenski ətrafında ciddi narahatlıq yaranıb. Bu narahatlıq Trampın son açıqlamalarından sonra daha da artıb. ABŞ prezidenti bəyan edib ki, Rusiya ilə mümkün sülh sazişi Ukraynanın bəzi ərazilərinin “mübadiləsini” nəzərdə tuta bilər. Zelenski isə bu yanaşmanı qətiyyətlə rədd edərək bildirib ki, belə bir plan Ukraynanın suverenliyinə ziddir və konstitusiya baxımından mümkün deyil.

Zelenski Avropa liderlərinə ünvanladığı mesajında vurğulayıb: “Ukraynanın iştirakı olmadan hər hansı sülh razılaşması qəbuledilməzdir. Torpaqlarımızı işğalçıya güzəştə getmək Ukrayna xalqına qarşı xəyanətdir.”

Mənbələrin məlumatına görə, Zelenskinin çağırışından dərhal sonra Avropa Komissiyası, Fransa, İtaliya, Böyük Britaniya, Polşa və Finlandiya birgə bəyanat yayaraq Ukraynanın beynəlxalq səviyyədə tanınmış sərhədlərinin toxunulmaz olduğunu təsdiqləyib və ərazilərin zorla dəyişdirilməsinə qarşı olduqlarını bildirib.

Politoloqlar hesab edirlər ki, Zelenskinin bu addımı həm də Avropanın siyasi birliyini möhkəmləndirmək və ABŞ-Rusiya danışıqlarında Ukraynanın mövqeyini qorumaq məqsədi daşıyır. Onların fikrincə, Trampın təklif etdiyi “ərazi mübadiləsi” planı, əslində, Moskvanın işğal etdiyi bölgələr üzərində nəzarətini rəsmiləşdirmək anlamına gələ bilər ki, bu da Qərbin uzun illərdir müdafiə etdiyi “sərhədlərin dəyişməzliyi” prinsipinə ziddir.

Zelenski isə mövqeyində qəti olduğunu bir daha bəyan edib: “Ukraynanın hər qarışı müqəddəsdir. Biz ərazi bütövlüyümüzdən imtina etməyəcəyik, çünki bu, yalnız bizim deyil, bütün azad dünyanın təhlükəsizliyi məsələsidir.”

Musavat.com