Cümə günü səhər saatlarında Pakistanın cənub-qərbində törədilən partlayışda 5-i məktəbli uşaq olmaqla, azı 7 nəfər ölüb, 17 nəfər yaralanıb.

Rəsmilərin bildirdiyinə görə, motosikletə quraşdırılmış əldəqayırma bomba zorakılıqların baş verdiyi Bəlucistan vilayətinin Mastunq rayonunda partlayıb. Belə görünür, hədəf məktəbin yaxınlığındakı polis avtomobili olub.

Ölənlər arasında azı bir polis əməkdaşı olub, bir neçəsi isə yaralanıb.

Rəsmilər polis maşınının ölkə boyu uşaqlara iflic virusuna qarşı peyvənd vurmaq kampaniyasında iştirak edən qrupları qorumaq üçün personal daşıdığını bildirib.

Pakistanda 2024-cü ildə poliomielit halları yenidən artır. Ölkədə bu il 43 yoluxma halı qeydə alınıb ki, onlardan 22-nin Əfqanıstanla həmsərhəd olan Bəlucistanda baş verdiyi bildirilib.

Vilayət hökuməti və Pakistanın baş naziri Şehbaz Şərif ayrı-ayrı bəyanatlarda zorakılığı "terror hücumu" kimi pisləyib.

Bir neçə etnik bəluc separatçı qruplarının müntəzəm olaraq təhlükəsizlik qüvvələrinin üzvlərini və hökumət obyektlərini hədəf aldığı zəngin təbii ehtiyatları ilə tanınan Bəlucistanda partlayışa görə məsuliyyəti heç bir qrup öz üzərinə götürməyib.

Çərşənbə axşamı silahlı şəxslər vilayətin əhalinin az məskunlaşdığı Pəncgur rayonunda bəndin işçilərinə hücum edərək, 5 nəfəri öldürüb, 2 nəfəri yaralayıb. Bu hücuma görə məsuliyyəti qadağan edilmiş "Bəluc Azadlıq Ordusu" öz üzərinə götürüb.

Keçən ay başqa bir rayonda ağır silahlanmış şəxslər daş kömür mədəninə basqın edərək, 21 işçini qətlə yetirib.