İsrail baş nazirinin ofisi cümə günü bildirib ki, İsrail qüvvələri Hizbullah ilə atəşkəs razılaşmasında geri çəkilmək üçün nəzərdə tutulan bazar günündən sonra Livanın cənubunda qalmağa davam edəcək, çünki razılaşmanın şərtləri tam yerinə yetirilməyib.

Noyabrın 27-də qüvvəyə minən razılığa əsasən, Hizbullahın silahları və döyüşçüləri Litani çayının cənubundakı ərazilərdən çıxarılmalı və İsrail qoşunları geri çəkilməli, Livan ordusu isə bölgəyə yerləşdirilməli idi və bunların hamısı bazar günü səhər saat 4-də başa çatacaq 60 günlük müddət ərzində olmalı idi.

ABŞ və Fransanın vasitəçiliyi ilə əldə olunan razılaşma İsrail və İranın dəstəklədiyi Hizbullah arasında bir ildən çox davam edən hərbi əməliyyatlara son qoyub. Döyüşlər İsrailin böyük hücumuna gətirib çıxarmışdı ki, bu da Hizbullahın ciddi şəkildə zəifləməsinə və Livanda 1,2 milyondan çox insanın didərgin düşməsinə səbəb olmuşdu.

Birləşmiş Ştatlar, Britaniya və başqa Qərb ölkələri Hizbullahı terror qrupu kimi tanıyıb.

Netanyahunun ofisi açıqlamasında bildirib ki, İsrail ordusunun çıxarılma prosesi, “Livan ordusunun Livanın cənubunda yerləşdirilməsi və razılığı tam və effektiv şəkildə yerinə yetirməsindən, Hizbullahın isə Litanidən uzağa çəkilməsindən asılıdır.”

“Atəşkəs razılığı Livan dövləti tərəfindən tamamilə icra edilmədiyi üçün, tədricən geri çəkilmə prosesi ABŞ ilə tam koordinasiyada davam etdiriləcək,” açıqlamada deyilir.

Livan və ya Hizbullah dərhal şərh verməyib.

Ağ Ev də şərh istəyinə dərhal cavab verməyib.

Hizbullah cümə axşamı deyib ki, İsrailin geri çəkilməsində hər hansı ləngimə razılığın qəbuledilməz pozuntusu olacaq və Livan dövləti bununla "beynəlxalq xartiyalarla təmin edilmiş bütün vasitə və üsullarla" mübarizə aparmalı olacaq.

İsrail bildirib ki, Hizbullaha qarşı kampaniyası Hizbullahın raket atəşi nəticəsində İsrailin şimalında evlərini tərk etməyə məcbur qalan on minlərlə insanın evlərinə geri qayıtmalarını təmin etməyi hədəfləyib.

O, münaqişə zamanı Hizbullaha böyük zərbələr vurub, lideri Həsən Nəsrallahı və qrupun minlərlə döyüşçüsünü öldürüb, arsenalının böyük bir hissəsini dağıdıb.

Hizbullah dekabr ayında suriyalı müttəfiqi Bəşər Əl-Əsədin devrilməsi və nəticədə İrandan quru tədarük marşrutunun kəsilməsi səbəbilə daha da zəifləyib