Koreya yarımadasında silahlı qarşıdurmanın bərpası nəticəsində yüz minlərlə insan müharibənin ilk günlərində qurban olacaq.

Axar.az xəbər verir ki, bu barədə Konqresin Tədqiqat Xidmətinin hesabatında deyilib.

Məlumata görə, hətta nüvə silahından istifadə olunmasa belə, müharibənin ilk günlərində itki sayı 30 mindən 300 minə qədər ola bilər. Tədqiqatçıların belə qənaətə gəlməsində səbəb isə Şimali Koreya artilleriyasının dəqiqə ərzində 10 min raket buraxmaq potensialı göstərilib. Müharibə nəticəsində eyni zamanda hər iki tərəfdən ümumilikdə 25 milyondan çox insanın zərər görəcəyi açıqlanıb.

ABŞ Konqresində həmçinin mümkün müharibə zamanı Çin, Rusiya, Yaponiya kimi ölkələrin də döyüşlərə qoşulmaq ehtimalı olduğu açıqlanıb.

Qeyd edək ki, bir qədər əvvəl Şimali Koreyanın nüvə başlıqlarının 15-250 kiloton arası gücə malik olduğu açıqlanmışdı.