Keçmiş MTN şefinin nazir olduğu dövrlə bağlı maliyyə yoxlamalarına başlanılıb

Keçmiş milli təhlükəsizlik naziri Eldar Mahmudovun hələ də həbs olunmaması müzakirə mövzusu olaraq qalır. Bir neçə gün əvvəl Azadlıqın yaydığı məlumatda bildirilirdi ki, Eldar Mahmudov MTN-də baş verənlərlə bağlı məsuliyyəti üzərindən atıb.

O, iddia edib ki, komandasının törətdiyi əməllərin çoxundan xəbərsiz olub. Beləliklə, keçmiş MTN şefi faktiki olaraq komandasını satıb.
Dünən əldə etdiyimiz məlumatlara görə, Eldar Mahmudovun həbsinə ciddi əsas ola biləcək prosesə start verilib. Bildirilir ki, maliyyə naziri Samir Şərifovun şəxsi nəzarəti altında Eldar Mahmudovun nazir olduğu dövrdə dövlət büdcəsindən MTN-ə ayrılan pulların necə xərclənməsi ilə bağlı yoxlamalar aparılır. Bildirilir ki, bu yoxlamaların nəticəsi olaraq Eldar Mahmudovla bağlı konkret qərar verilə bilər. Ehtimal olunur ki, yoxlamaların yeni başlamasına baxmayaraq artıq büdcədən ayrılan pulların mənimsənilməsi ilə bağlı yetərincə faktlar var. Lakin yoxlamalar hələ davami edir və güman ki, daha şok korrupsiya faktları üzə çıxacaq. Ehtimal olunur ki, bu faktlar Eldar Mahmudovun həbsinə apara bilər.