Çin elektron ticarət nəhəngi "Alibaba" beynəlxalq genişlənmə və bulud xidmətlərinə sərmayə yatırmaq üçün 3,2 milyard ABŞ dolları həcmində sıfır faizli konvertasiya olunan istiqraz satışına çıxıb.

Valyuta.az xəbər verir ki, istiqraz 2032-ci ildə ödəniləcək və ABŞ-də listinqdə olan səhmlərə çevrilə biləcək. Konversiya qiyməti hazırkı bazardan 27,5–32,5% yuxarı təyin olunub. Vəsaitin 80%-i data mərkəzlərinin genişləndirilməsinə və texnologiyanın yenilənməsinə, qalan hissəsi isə elektron ticarət sahəsində səmərəliliyin artırılmasına yönəldiləcək.

Beləliklə, bu xəbərin fonunda Honq-Konq səhmləri 2,6%, Nyu-York birjasında isə 2,2% ucuzlaşıb. Buna baxmayaraq, ilin əvvəlindən bəri şirkətin səhmləri 71%-dən çox bahalaşıb.

"Alibaba" ötən il və bu ilin əvvəlində də oxşar istiqraz satışları həyata keçirib. Şirkət həmçinin, növbəti üç ildə 53 milyard dollara yaxın süni intellekt yatırımı planlaşdırır.