Şimali Atlantika alyansı Rusiya ilə mümkün münaqişə vəziyyətində NATO qüvvələrinin tez bir zamanda kerosin və dizel yanacağı ilə təmin oluna bilməsi üçün Soyuq Müharibədən bəri Almaniyada mövcud olan boru kəməri infrastrukturunu Aşağı Saksoniya federal əyalətindən Polşaya və Bavariyadan Çexiyaya kimi genişləndirmək niyyətindədir.
Bizimyol.info xəbər verir ki, bu barədə “Der Spiegel” jurnalı yazıb.

Nəşrin məlumatına görə, Polşa və Çexiyada yanacağın daha şərqə, məsələn, Almaniya Silahlı Qüvvələrinin briqadasının yerləşdiriləcəyi Litvaya nəqli üçün boru kəmərlərinin çəkilməsi də planlaşdırılır. Almaniya Müdafiə Nazirliyi boru kəmərinin bir kilometrinin tikintisinin dəyərini 1 milyon avro, İnqolştadt-Çexiya marşrutunun dəyərini təqribən 240 milyon avro, Bramşe-Polşa marşrutunun dəyərini 1 milyard avro, Şimali Avropa Boru Kəməri Sistemi (NEPS) ilə NATO-nun Mərkəzi Avropa Boru Kəməri Sisteminin (CEPS) birləşdirilməsini 47 milyon avroya qədər qiymətləndirir.

Jurnal yazır ki, 20-25 il çəkə biləcək layihənin ümumi dəyərinin 21 milyard avro olacağı gözlənilir, boru kəmərinin özü isə əsasən 2035-ci ilə qədər tamamlanacaq. Almaniyanın müdafiə naziri Boris Pistoriusun göstərdiyi kimi, Almaniya bu layihə üçün 3,5 milyard avrodan çox vəsait ayıracaq. “Hərbçilərimiz üçün etibarlı yanacaq təchizatı onların döyüşə hazır olması üçün ən vacib şərtlərdən biridir”, - deyə Almaniyanın müdafiə naziri “Der Spiegel” nəşrinə bildirib.

Bununla belə, nəşr yazıb ki, layihənin həyata keçirilməsinə müəyyən problemlər mane ola bilər. Xüsusilə, boru kəməri Veser və Elba da daxil olmaqla bir neçə çayın altından çəkilməlidir. Marşrut boyu baş verə biləcək qəzalardan qorunmalı olan su obyektləri və qoruqlar var.

Eyni zamanda, “Der Spiegel”in qeyd etdiyi kimi, NATO Şurası boru kəmərinin tikintisinin təsdiqini yaya qədər başa çatdırmaq istəyir. Lakin Donald Trampın ABŞ prezidenti seçilməsi ilə maliyyələşmə qeyri-müəyyən sayılır. Bununla belə, tikinti planlaşdırıldığı kimi başa çatsa belə, yanacaq qeyri-müəyyən müddətə saxlanıla bilmədiyi üçün kerosinin saxlanması problemi qalmaqdadır, jurnal belə qənaətə gəlir.

Sankt-Peterburq Beynəlxalq İqtisadi Forumu çərçivəsində dünya xəbər agentliklərinin rəhbərləri ilə təşkil edilən görüşdə Rusiya prezidenti Vladimir Putin kollektiv Qərbin Rusiyanın NATO ölkələrinə hücuma hazır olması ilə bağlı dediklərini “cəfəngiyyat” və “açıq yalan” adlandırıb.