Saxta üsullara əl ataraq “əlillik” əldə edənlərlə bağlı yeni addım atılacağı gözlənilir. Həmin şəxslərin saxta əlilliklərinə görə aldıqları müavinətin dövlət büdcəsinə geri qaytarılacağı haqqında məlumatlar var. Bəs yayılan bu məlumat reallaşa bilərmi və müavinətlərin geri qaytarılması mümkündürmü? İqtisadiyyat.Az saytının əməkdaşı mövzu ilə əlaqədar Vətəndaşların Əmək Hüquqlarını Müdafiə Liqasının sədri Sahib Məmmədovun fikrini öyrənib:

“Bu barədə KİV-də məlumat yayılıb ki, Əmək və Əhalinin Sosial Müdafiə Naziri cənab Sahil Babayevin açıqlamasından bəlli olub ki, 1055 nəfərin saxta əlilliklə pensiya alıb. Təbii bu o demək deyil ki, əlavə bu üsulla müavinət yoxdur. Yəqin ki, müəyyən olunmayan daha çox vətəndaş qalıb. Deyilib ki, həmin şəxslərdin saxta yolla aldığı təqaüdlər geri alınacaq. Amma məsələ burasındadır ki, əgər birinə 10-15 il əvvəl bu təqaüd təyin olunubsa, həmin vəsaiti necə geri alacaqlar? Vəsaitin geri alınması ilə bağlı qanunvericilikdə dəymiş zərərin geri alınması ilə bağlı müddətlər var. Bu prosesin necə həyata keçiliməsi hələ ki, bəlli deyil. Həmin şəxslərə saxta təqaüd təyin edənlər 10-15 il əvvəl bunu ediblərsə, artıq onlar məsuliyyət daşımırlar. Hesab edirəm ki, pulları geri almaq çox az hissədə mümkün ola bilər. Eləsi var ki, maddi imkanı məhduddur, heç məhkəmə qərar qəbul etsə də ödəmə qabiliyyəti yoxdur. Eləsi var o artıq dünyadan köçüb. Hələ bunların saxtalığı sübut olunandan sonra məhkəmə onlara təqaüdün verilməməsini ilkin qərar kimi qəbul edə bilər. Yəni, bu vəsaitlərin geri necə və hansı mexanizmlə alınacağı barədə fikrim yoxdur. Açığı bunun belə olmağı narahatlıq doğurur. Ona görə də əgər nazirlik pulların geri alınması barədə nəsə deyibsə izahın da verməlidir”.