Deyr əz-Zor və Həsəkə əyalətlərində ABŞ-ın üç hərbi bazası Suriyanın şərqində ABŞ hərbçilərinə qarşı fəaliyyət göstərən ərəb qəbilə silahlıları tərəfindən raket atəşinə tutulub.

Publika.az xəbər verir ki, bu barədə TASS Fars Xəbər Agentliyinin geniş bəyanatına istinadən məlumat yayıb.

Beş raket Amerika qüvvələrinin Koniko qaz yatağı ərazisindəki mövqelərinə, dördü isə Əl Ömər neft yatağı yaxınlığındakı ABŞ bazasında partlayıb. Raketlərdən biri Əl Şəddadi bazasındakı aerodroma düşüb.

Hadisə şahidlərinin sözlərinə görə, Konikodan səmaya tüstü qalxıb. Ərazidə isə təcili yardım maşınlarının siqnalları eşidilir. Amerika hərbi komandanlığının Bağdaddakı nümayəndəsi hələlik bazalara hücum faktlarını təsdiqləməyib.

Qeyd edək ki, suriyalı döyüşçülər öz bəyanatlarında vəd ediblər ki, onlar bütün Suriya torpaqları işğalçılardan təmizlənənə qədər Amerika qoşunlarının qalalarını məhv etməyə davam edəcəklər.