Pentaqon rəhbəri Pit Heqset ABŞ Müdafiə Kəşfiyyat İdarəsinin (DIA) direktoru, general-leytenant Cefri Kruzu vəzifəsindən azad edib.
Bu barədə "The Washington Post" məlumat yayıb.

Məlumata görə, generalın vəzifədən azad edilməsinə nazirin Kruza olan etimadını itirməsi səbəb olub.

Qəzet qeyd edir ki, bu qərarın əsas səbəbi ABŞ-nin İranın nüvə obyektlərinə endirdiyi zərbələrin nəticələrinin DIA tərəfindən qiymətləndirilməsi ola bilər. Belə ki, aparılan təhlil hücumun Tehranın nüvə bombası əldə etməsini yalnız bir neçə ay gecikdirdiyini göstərib.

Bu nəticə isə İranın hücumdan sonra nüvə silahı əldə etmək imkanından tamamilə məhrum olduğu barədə iddialar irəli sürən Pit Heqset və ABŞ Prezidenti Donald Trampın bəyanatları ilə kəskin ziddiyyət təşkil edib.