Dünyanın hər yerində insanlar gəlirlərini artırmaq və maliyyə gələcəyini təmin etmək məqsədilə müxtəlif sahələrə sərmayə qoyurlar. Bəzi insanlar pulunu fond bazarına yatırır, bəziləri daşınmaz əmlaka və ya biznesə sərmayə edir. Hər bir sərmayə növü müəyyən risklər və qazanc potensialı daşıyır, lakin məqsəd eyni qalır - gəlir əldə etmək və maliyyə sabitliyini təmin etmək.

Dünyada sərmayəni idarə edən ən nəhəng şirkətlərdən biri BlackRock sərmayə şirkətidir.

BlackRock nədir və necə işləyir?

BlackRock 1988-ci ildən bəri fəaliyyət göstərən nəhəng sərmayə şirkətidir. Şirkət milyardlarla dollar sərmayəni idarə edir və qlobal maliyyə bazarlarında ciddi təsirə malikdir. Əsas fəaliyyəti müştərilərin sərmayələrinin idarə olunmasıdır: Müştərilərə fondlar, aksiyalar, istiqrazlar və digər investisiya məhsulları təklif edir, müştərilər üçün risk analizləri aparır, maliyyə portfellərini optimallaşdırır və böyük maliyyə bazarlarında sərmayə riskini minimuma endirmək üçün strategiyalar hazırlayır. BlackRock-un ən tanınmış məhsulu iShares ETF-ləridir.

Şirkətin bu qədər əhəmiyyətli olmasına səbəb nədir?

BlackRock-un qərarları qlobal maliyyə bazarlarına birbaşa təsir göstərir. Şirkət, iqtisadi dəyişikliklər, faiz dərəcələri və qlobal investisiya trendləri ilə bağlı göstəricilər təqdim edir və dünyanın bir çox ölkəsində pensiya fondları, banklar və digər maliyyə institutları BlackRock-un xidmətlərindən istifadə edir.

Şirkət neçə trilyon dollarlıq sərmayəni idarə edir?

2025-ci ilin ikinci rübü (aprel–iyun) üzrə şirkətin idarə etdiyi aktivlərin ümumi məbləği $12.53 trilyon təşkil edib. Bu isə keçən illə müqayisədə 18% artım deməkdir.
Nəticə etibarilə, deyə bilərik ki, BlackRock həm maliyyə mütəxəssisləri, həm də adi investorlar üçün dünya maliyyəsinin formalaşmasında əsas oyunçulardan biridir.