ABŞ-ın Miçiqan ştatında hava şousunda Sovet istehsalı olan MiQ-23 qırıcısı qəzaya uğrayıb. Pilot və ikinci ekipaj üzvü təyyarədən atılıb...

Poliqon Rusiya mətbuatına əsasən xəbər verir ki, qırıcı Detroit yaxınlığındakı Bellevil şəhərində yaşayış kompleksinin dayanacağına çırpılıb. Detroit Beynəlxalq Hava Limanının saytında yer alan xəbərə görə, bir neçə avtomobilə ziyan dəyib.

MiQ-23 dəyişən qanad həndəsəsinə malik çoxməqsədli qırıcıdır. 1969-cu ildə istifadəyə verilmiş, 1985-ci ildə kütləvi istehsal dayandırılmışdır. Təyyarələr Əfqanıstan, Əlcəzair, Anqola, Bolqarıstan, Kuba, Çexoslovakiya, Almaniya, Misir, Liviya, Macarıstan, İraq, Hindistan, Şimali Koreya, Efiopiya, Cənubi Yəmən, Polşa, Suriya və Vyetnama ixrac edilib.

Pilot və ikinci ekipaj üzvü xəstəxanaya yerləşdirilib. Onlar ciddi xəsarət almayıblar. Başqa heç kim zərər görməyib.

ABŞ Federal Aviasiya Administrasiyası araşdırma aparır. Qəzanın mümkün səbəbləri barədə hələlik məlumat verilmir.