AVRO-2020-nin qrup mərhələsi davam edir.

Apasport.az saytının məlumatına görə, bu gün II tur çərçivəsində daha üç oyun keçiriləcək.

Öncə E qrupunda tura start veriləcək. Qrupu sürpriz lideri Slovakiya İsveçlə üz-üzə gələcək. İlk matçında Polşaya qalib gələn slovakiyalılar qələbə qazansa, 1/8 finala yüksələcək.

Digər iki qarşılaşma D qrupunda təşkil olunacaq. İlk turda qalib gələn komandalar xala həsrət rəqiblərini sınağa çəkəcək.

Xorvatiya ilk xallarını Çexiya ilə görüşdə qazanmaq üçün mübarizə aparacaq. Balkanlılar məğlub olsa, bu nəticə çexiyalıları 1/8 finala daşıyacaq.

İngiltərə də növbəti üç xalla qrupdan çıxa bilər. Bunun üçün futbolun yaradıcıları Böyük Britaniya derbisində Şotlandiyanı yenməlidir.

Qeyd edək ki, tura iyunun 19-da yekun vurulacaq. Turun ilk iki günündə İtaliya, Belçika və Niderland 1/8 finala vəsiqə qazanıb.

AVRO-2020
II tur, 18 iyun

E qrupu
17:00. İsveç - Slovakiya
Baş hakim: Daniel Zibert (Almaniya)
“Sankt-Peterburq” stadionu

D qrupu
20:00. Xorvatiya - Çexiya
Baş hakim: Karlos del Serro Qrande (İspaniya)
Qlazqo. “Hampden Park” stadionu

23:00. İngiltərə - Şotlandiya
Baş hakim: Antonio Mateu Lahoz (İspaniya)
London. “Uembli” stadionu