Bu gündən Ermənistanda ölkədaxili yollarda hərəkət məhdudiyyətləri tətbiq edilməyə başlayıb.

Publika.az Ermənistan KİV-nə istinadla bildirir ki, buna səbəb ölkənin əsas magistral yollarının buz bağlamasıdır.

Paytaxt İrəvanla əyalətləri, eləcə də İran və Gürcüstan istiqamətini birləşdirən sərt döngəli dağ yollarında ağır tonnajlı yük maşınlarının hərəkəti tamamilə, kiçik tutumlu yük maşınları və minik avtomobilləri üçün isə qismən qapadılıb. Ölkənin aidiyyəti qurumları mövcud vəziyyətin nə zamana qədər davam edəcəyi ilə bağlı detallı məlumat verməyib.

Qeyd edək ki, Rusiyadan Ermənistana gedən 400-ə yaxın TIR da yolların buz bağlaması səbəbindən iki həftədən çoxdur Gürcüstan sərhəddində gözləməkdədir.