Rusiya Silahlı Qüvvələrinin Quru Qoşunlarına yeni baş komandan təyin olunub. Bu vəzifəyə general-polkovnik Andrey Mordviçev gətirilib.

Bu barədə məlumatı Mash teleqram kanalı yayıb. Bildirilir ki, əvvəlki baş komandan Oleq Salyukov yaş həddinə görə vəzifədən azad edilib. Qeyd edək ki, Salyukovun 21 mayda 70 yaşı tamam olacaq.

Yeni təyinat alan Mordviçev bundan əvvəl Rusiya Cənub Hərbi Dairəsinin 8-ci ümumqoşun ordusunun komandiri olub. Onun rəhbərliyi altında birləşmələr Ukraynadakı müharibənin cənub istiqamətində fəaliyyət göstərib.

Xatırladaq ki, Mariupolun ələ keçirilməsi də məhz Mordviçevin komandanlığı altında həyata keçirilmişdi. Ukrayna isə bir müddət əvvəl onun öldüyünü iddia etmişdi.