Rusiyalı alimlər potensial ciddi sağlamlıq risklərinə görə insan orqanizminin Marsa uçuşa tab gətirə biləcəyinə şübhə ilə yanaşıblar.
Bu barədə TASS agentliyinə müsahibəsində Rusiya Elmlər Akademiyasının prezidenti Gennadi Krasnikov danışıb.

"Əlbəttə ki, pilotlu kosmonavtikanın gələcəyi var. Amerikalıların, bizim və çinli tərəfdaşlarımızın Ayda bazalar tikmək üçün proqramları var. İndi İlon Mask Marsın sürətləndirilmiş tədqiqi proqramını irəli sürür. Bu, daha ciddi məsələdir, çünki o, Aydan daha uzaqda yerləşir. Faktiki olaraq, ikinci kosmik sürətlə Marsa qədər məsafə 250 günlük uçuş deməkdir. Orada sağlamlığa təsir edən faktorlar daha ciddidir, ağır hissəciklər var və biz onların insan orqanizminə necə təsir edəcəyini yaxşı bilmirik. Marsa bu uçuş hələ də bizdə suallar doğurur: insan orqanizmi açıq kosmosda ağır hissəciklərə tab gətirə bilərmi?", - deyə Krasnikov bildirib.