Haaqada yerləşən Beynəlxalq Cinayət Məhkəməsi Rusiyanın Ukraynaya hərbi müdaxiləsi nəticəsində törədilmiş hərbi cinayətləri və insanlıq əleyhinə cinayətləri araşdırmağa başlayıb.

Bu barədə Beynəlxalq Cinayət Məhkəməsinin prokuroru Kərim Xanın bəyanatında bildirilir.

Kərim Xan bəyan edib ki, Ukraynadakı situasiya barədə 39 ölkədən müraciət daxil olub və bu da həmin ölkədə 2013-cü il noyabrın 21-dən etibarən baş verənlərə dair araşdırma başlatmağa imkan yaradıb. Araşdırma həmin vaxtdan bu yana qədər Ukraynanın istənilən hissəsində istənilən şəxslər tərəfindən törədilmiş soyqırım cinayətlərini, insanlıq əleyhinə və hərbi cinayətləri əhatə edəcək.

“Mən Beynəlxalq Cinayət Məhkəməsinin rəhbərliyini situasiyaya dair fəal araşdırma başlatdığım barədə xəbərdar etdim. Bizim işimiz sübutların toplanması ilə başlayıb”, - Kərim Xan deyib.

Onun sözlərinə görə, ilkin analiz Ukraynada Beynəlxalq Cinayət Məhkəməsinin yuridiksiyası altına düşən müharibə cinayətlərinin törədildiyini deməyə əsas verir. Xan obyektiv və müstəqil araşdırma aparacağını vəd edib.