ABŞ Prezidenti Donald Tramp "NBC News" telekanalının jurnalistini Qətərin hədiyyə etdiyi təyyarə ilə bağlı sualına görə danlayıb.

Oxu.Az xəbər verir ki, bu barədə "Deadline" nəşri məlumat yayıb. İnsident Cənubi Afrika Respublikasının (CAR) prezidenti Siril Ramafosa ilə Ağ Evdə keçirilən görüş zamanı baş verib.

Tramp görüş zamanı Ramafosa ilə CAR-da ağdərili fermerlərə qarşı soyqırımı ittihamlarını müzakirə edib və ehtimal olunur ki, bu iddiaları sübut edən videolar nümayiş etdirib. Bundan sonra jurnalistlərə sual verməyə icazə verilib. NBC müxbiri isə Qətər təyyarəsi ilə bağlı sual ünvanlayıb.

"Bilirsiniz, sizin buradan çıxmağınızın vaxtıdır. Bunun Qətər təyyarəsi ilə nə əlaqəsi var? Biz bir çox başqa məsələlərdən danışırıq və NBC sizin indicə gördüklərinizlə bağlı mövzudan yayınmağa çalışır. Siz dəhşətli bir müxbirsiniz", - deyə Tramp cavab verib.