Lənkərançayın yatağının “PROFCO” MMC tərəfindən qazılaraq daşınması ilə bağlı daxil olmuş şikayətə Dövlət Ekoloji Təhlükəsizlik Xidmətinin rəsmisi Bəhruz Məhəmmədov münasibət bildirib.

O qeyd edib ki, Lənkəran rayonu Təngivan kəndinin ərazisində, Lənkərançay çayının yatağında fəaliyyət göstərən “PROFCO” MMC ilə bağlı Dövlət Ekoloji Təhlükəsizlik Xidməti, Milli Hidrometeorologiya Xidməti və Nazirliyin yerli qurumları tərəfindən dəfələrlə araşdırma aparılıb və barələrində qanunamüvafiq tədbirlər görülüb.

“2021-ci il ərzində aparılan araşdırmalar zamanı isə “PROFCO” MMC-nin “Dağ Mədən İşlərinin İnkişafı Planı”nın olmadığı, şirkət tərəfindən çayın yatağında qanunsuz qazıntı işlərinin aparıldığı və çirkab suların birbaşa çaya axıdıldığı müəyyən edilib. MMC-nin hüquqi şəxs qismində cərimələnməsi üçün toplanmış sənədlər Lənkəran Rayon Məhkəməsinə göndərilib”.

Xidmət rəsmisi onu da qeyd edib ki, eyni zamanda, “PROFCO” MMC-nin fəaliyyətinin dayandırılması və barəsində qanunvericiliyə uyğun tədbirlərin görülməsi üçün toplanmış sənədlər Baş Prokurorluğa göndərilib.