Çin Rusiya avtomobil bazarını ələ keçirir – Son rəqəmlər
4-08-2022, 12:42
Ötən ilin eyni dövrü ilə müqayisədə bu ilin iyul ayında Rusiyada yeni avtomobillərin satışı 58,5% azalıb.
Yeniavaz.com “Avtostat” agentliyinə istinadən bildirir ki, Rusiyada ən çox satılan ilk 10 avtomobil markası arasında artıq 4 Çin markası – “Chery”, “Geely”, “Haval” və EXEED yer alıb.
2022-ci ilin iyul ayının nəticələrinə görə, yeni minik avtomobillərinin satışı ötən ilin iyul ayı ilə müqayisədə 4 dəfə azalaraq cəmi 35 min 583 ədəd təşkil edib.
Yerli istehsal olan LADA markası bazarda lider olaraq qalır. İyulda onun payı 29,2%-ə qədər artıb (bir il əvvəl 25% olub). Ötən ay ruslar 10 min 400 yeni LADA avtomobili alıblar. Koreyanın “Kia” (4 min 4 ədəd) və “Hyundai” (3 min 397 ədəd) brendləri hələ də ilk üçlükdəki mövqelərini qoruyub saxlasalar da, onların payı getdikcə azalır.
Onları izləyən 3 Çin brendi ümumi satışdakı paylarını artırıb. “Chery”nin payı 2,9%-dən 7,2%-ə, “Geely”nin payı 1,8%-dən 6,5%-ə, “Haval”ın payı isə 2,4%-dən 6,1%-ə yükəslib. Doqquzuncu yerdə olan Çinin EXEED markası isə öz payını 0,1%-dən 2,8%-ə yüksəldib.
2022-ci ilin ilk 7 ayının yekunlarına gəlincə, bu müddət ərzində Rusiya sakinləri 387 min 712 yeni avtomobil alıblar ki, bu da ötən ilin yanvar-iyul ayları ilə müqayisədə 58,5% azdır.
Ən populyar xarici avtomobil hələ də 3-cü yeri tutan “Kia Rio”dur.
Bildirilir ki, Avropa və Yaponya istehsalı olan markaların Rusiyadan çıxması Çin brendlərinə onların bazar paylarını ələ keçirməyə imkan verib. İyun ayının nəticələrinə görə, ruslar Çin markalı 6 min 875 yeni minik avtomobili alıblar ki, bu da artıq ümumi bazarın 21%-ni təşkil edir.
