ABŞ prezidenti Donald Tramp Kanadanın Ontario əyalət liderinin 1,5 milyon amerikalı istehlakçısına satılan elektrik enerjisinə 25% rüsum əlavə etdiyini açıqlamasından sonra çərşənbə axşamı Kanada ilə ticarət müharibəsini gərginləşdirərək, şimal qonşusunun polad və alüminium ixracına qoyulan 25%-lik ABŞ tarifini iki dəfə artıraraq 50%-ə çatdırıb.

Truth sosial media platformasında böyük hərflərlə yazı paylaşan Tramp Kanadanı “dünyanın ən yüksək tarifli ölkələrindən biri” adlandırıb. Prezident ABŞ-ın polad və alüminiuma ikiqat tariflərinin çərşənbə günü səhər qüvvəyə minəcəyini deyib.

Bundan əlavə, Tramp Ottavadan tələb edib ki, “uzun müddətdir ki, ABŞ-ın müxtəlif süd məhsullarına 250%-dən 390%-ə qədər hədsiz hesab edilən anti-Amerika fermer tariflərini dərhal dayandırsın”.

Tramp keçən həftə ABŞ-a ixrac edilən bütün məhsullara 25% rüsum tətbiq edərək, sonra isə bir ay gecikdirməklə, sadiq müttəfiqi və ABŞ-ın Meksikadan sonra ikinci ən böyük ticarət tərəfdaşı olan Kanada ilə iqtisadi müharibəni alovlandırıb. Tramp Kanadaya miqrantların və qeyri-qanuni narkotiklərin, xüsusən də ölümcül opioid fentanilin ABŞ-a axınını daha da məhdudlaşdırmaq üçün təzyiq göstərdiyini deyib.

Kanadanın hakimiyyətdən gedən baş naziri Castin Trudo cavab olaraq ABŞ ixracatına daha yüksək tariflər elan etdi. Sonra isə Ontario əyalətinin lideri Doq Ford bazar ertəsi günündən etibarən Ontarionun ABŞ-ın Kanada ilə həmsərhəd olan üç şimal ştatında - Miçiqan, Minnesota və Nyu Yorkda yaşayış və kommersiya müştərilərinə göndərdiyi elektrik enerjisi üçün 25% daha çox ödəniş alacağını deyib.

“Mən bu rüsumu artırmaqdan çəkinməyəcəyəm. Əgər ABŞ bunu gərginləşdirərsə, onda elektrik enerjisini tamamilə kəsməkdən çəkinməyəcəyəm”, Ford Torontoda keçirdiyi mətbuat konfransında bildirib.

Tramp sosial şəbəkələrdəki paylaşımında cavab verib ki, “tezliklə təsirlənən ərazidə elektrik təchizatı sahəsində fövqəladə vəziyyət” elan edəcək. “Bu, ABŞ-a Kanadadan gələn bu hücum təhlükəsini yumşaltmaq üçün lazım olanı tez bir zamanda etməyə imkan verəcək”, o bildirib.