"Azəristiliktəchizat" ilə bağlı şikayətlər səngimək bilmir.

Sözügedən qurumun fəaliyyəti vətəndaşları narazı salır. "Azəristiliktəchizat" ona ehtiyac olan qış fəslində sözün əsl mənasında “kapriz” nümayiş etdirir. Həmin müddətdə bu qurumdan olan şikayətlərə nəzər saldıqda, deyilən sözə haqq verəcəksiniz. Deməli, hansısa yüksək mərtəbəli binada bir şəxs "Azəristiliktəchizat"a borcunu ödəmirsə, aləm bir-birinə dəyir. Bir nəfər borcunu ödəmədiyi üçün bu qurum tərəfindən bütün binanın istiliyi kəsilir.

Bəli, olduqca absurd səslənsə də, məhz bu addım atılır. Kiməsə görə soyuq havada bütün sakinlərin istiliyi qurum tərəfindən kəsilir. Onlar kiməsə görə pulunu ödədiyi xidməti ala bilmirlər. Bu, kapriz deyil, bəs nədir?

"Azəristiliktəchizat" guya bu addımı atmaqla qonşular tərəfindən həmin borclu şəxs üzərində təzyiq başqa sözlə, ictimai qınaq yaratmağa çalışır,. Yəni "Azəristiliktəchizat" borcunu özü ala bilmədiyi üçün başqalarından kömək istəyir. Nə qədər mənasız prosedur olsa da, mütəmadi olaraq təkrarlanır. Bunun tək bir adı var: sakinlərinə zülm vermək, bir nəfərə görə hər kəsi cəzalandırmaq.

"Azəristiliktəchizat" mərkəzləşdirilmiş qaydada istiliyin verilməsi üçün məbləğin hesablanması üçün də olduqca "unikal" bir metoda əl atıb. Belə ki, eyvan və qeyri-yaşayış yerlərini belə istilik verilməsi üçün evin kvadratına daxil edir. Bunun adı soyğunçuluqdan başqa bir şey deyil. Axı eyvan üçün istilik haqqı istəmək ağıla necə gələ bilər?

Hələlik qış bitsə də soyuq bitməyib və "Azəristiliktəchizat" abonentlərin əsəb sistemini pozmağa davam edir.