teref.az gənc aktrisa Cəmilə Tağızadənin “Qafqazinfo”ya müsahibəsini təqdim edir:

- “Dəfnə ağacı” reytinqli seriallardan biri hesab olunur. Siz isə həmin layihənin baş obrazını canlandırmısız. Bu ekran işi həyatınızda nə kimi dəyişiklik etdi?

- 6 ildən çoxdur ki, kamera qarşısındayam. Təhsil aldığım universitetin ikinci kursundan etibarən müxtəlif layihələrdə rol almağa başlamışam. “Dəfnə ağacı” çəkildiyim ilk serial deyil. Bu seriala dəvət aldım, “Dəfnə” obrazı üçün bir neçə aktrisa nəzərdə tutulmuşdu, təşəkkür edirəm ki, seçimləri məndən yana oldu. Həyatımda böyük dəyişiklik oldu. Serial daha da məşhur olmağıma səbəb oldu. Çox gözəl kollektivlə çalışdıq.

“Teatrda verilən maaşlardan iki dəfə artıq pul alırıq”

- Aktrisaların əksəriyyəti maaş azlığından şikayətlənir. Sizdə vəziyyət necədi?

- Azərbaycan seriallarına ayrılan büdcəyə nəzər salsaq, normal qonorar alıram. Qiymət barədə danışmaq istəmirəm, bu barədə icazə verilmir. Qonorarımız elə də az deyil. Teatrda verilən maaşlardan iki dəfə artıq pul alırıq.

- Qonşu ölkələrin aktrisaları seriala çəkilməmişdən qabaq qonorar barədə tələb irəli sürürlər. Bizdə niyə belə sistem qurulmayıb? Siz necə? Belə bir tələb irəli sürmüşdüz?

- Dünyanın heç bir yerində tanınmamış aktrisalar belə bir tələblə çıxış etmirlər. Yalnız özünü tutmuş və insanlar tərəfindən sevilmiş bir məşhur şərtlər irəli sürə bilər. Azərbaycanda hansı aktrisa-aktyor 1 milyon pul alıb ki, indi də prodüserlərə şərt qoysun? Tutaq ki, hər hansı bir aktrisa açıqlama verir ki, mən 10 ilin aktrisasıyam, peşəkaram və film üçün yarım milyon istəyirəm, bütün səhnələrə də çəkilirəm. Bizdə belə bir məbləğ var? Yaxın gələcəkdə də gözlənilmir.

- Son illər serial sahəsində müəyyən dirçəlişlərə rast gəlirik. Ancaq yerli seriallarda yer alan aktrisalarla tamaşaçı arasında elə bil ki, məsafə var. Süni və saxta görüntü yaranır. Bunun səbəbi nədədir? Texnika, səs və s. hesab etmək olar?

- Kino sahəsində 20 ildən artıq bir müddətdə durğunluq yarandı. Hələ yeni başlayırıq. Sizə bir misal çəkim. Telefon yatıb, tozlanıb. Daha sonra telefonun təzə və keyfiyyətli olmağını istəyirik. Bu düzgün deyil. Telefon 20 ildir ki, tozlanıb, işləmir, yenidən işə salmaq lazımdı. Birdən-birə uğur qazanmaq olmaz. Türkiyənin “Yeşilçam” dövründən bu yana filmləri inkişaf olundu. Peşəkarları ölkəyə cəlb etdilər, yerli aktrisaları əcnəbi ekspertlər öyrətdi. Hərdən instaqramda yazırlar ki, bu nə geyimdi? Sizi niyə belə geyindirirlər? Türkiyə seriallarında nə gözəl geyinirlər. Başlayırlar bizi müqayisə etməyə… Türkiyənin bir serial və filmlərində 50-dən çox butik əməkdaşlıq edir. Bizdə isə 2-3-nə rast gələ bilirik. Hələ yerli butiklər bizə naz edir. Zaman gələcək ki, Azərbaycan serialları Türkiyə layihələrini keçəcək. Bizim bazamız var. Sovet dövründə bir çox ölkələrdən uğurlu filmlər ərsəyə gətirmişik.

- Özünüz hansı seriallara baxırsız? Elə olub ki, öz serialınız TV-də yayımlanan zaman başqa sevdiyiniz ekran işinə baxmaq istəmisiz, kanalı çevirmisiz?

- Ancaq öz serialıma baxıram, vicdansızam, nə edim? (gülür) Arada “Vicdan haqqı” serialına da baxıram. Ancaq onu deyim ki, vaxtım olmur.

- Bəzi aktrisalar öz film və seriallarına baxanda utanırlar, kanalı çevirirlər…

- Onda həmin seriala çəkilməsinlər. Niyə çəkilirlər? Mən çəkildiyim layihələrə baxıram, pis oynadığım yerlərə diqqət edirəm. Özüm üçün ölçü götürürəm. Baxın, pis oynayan zaman utanıram, deyirəm ki, kaş başqa cür rolumu canlandırardım.

“Söyləyib ki, öz qiymətimi qaldırmaq üçün belə yola əl atmışam”

- “Əli və Nino” filmində də rol almısız…

- Bəli, Ninonun rəfiqəsi obrazını canlandırmışam. Halbuki, bəziləri yalandan məlumat yayıb ki, mən rəfiqə obrazını yox, qulluqçu obrazını oynamışam. Söyləyib ki, öz qiymətimi qaldırmaq üçün belə yola əl atmışam. Mənə fərqi yoxdu, aktrisayam, dilənçi obrazını belə oynaya bilərəm. Həyatdakı hər bir insan obrazdır, onları canlandırmaq lazımdır. Mən şayiə yayan insanlarla danışmışam, ancaq boynuna almır. Çox təəssüf ki, onların payını istədiyim kimi verə bilməmişəm. Olmayan şeyi niyə danışırlar?

- Xarici film və seriallarda baş qəhrəmanlar sevgili olur, hətta evlənirlər. Sizdə belə bir şey olmayıb?

- Heç bir dəfə də olsun ki, belə şey başıma gəlməyib. Heç vaxt…

“Həyatda olduğu kimi serialda da bəxtim gətirmədi”

- Serialın final bölümü yayımlandı. Sonda “Dəfnə” iki kişi arasında qalır…

- Həyatda olduğu kimi serialda da bəxtim gətirmədi, yazıq Dəfnə (gülür). Qız iki kişi arasında qaldı, sonu bilinmədi. Dedim ki, heç olmaya ərə gedər. Özüm ərə getməmişəm, obrazım ərə getsin (gülür). Təbii ki, zarafat edirəm.

“Qadın hər zaman öz təqəbəsinə uyğun kişi seçməlidir”

- Real həyatda tez-tez seçim arasında qalırsız?

- Belə bir şey olmayıb. Belə bir şey baş verərsə, hansı mənə uyğundursa, onu seçərdim. Mənə pul önəmli deyil. Qadın hər zaman öz təqəbəsinə uyğun kişi seçməlidir. Həm maddi, həm də mənəvi baxımdan sənlə eyni olmalıdır. Xanımdan yüksək də ola bilər. Ancaq elə də olar ki, çox varlı ola bilər, ancaq başı “xarab” çıxar. Milyonları var, ancaq heç bir işə yaramır. Arvadını döyür, söyür, narkomandır, spirtli içki qəbul edir.

- Sevgiliniz var?

- Təəssüf ki, yoxdu, “xalis” subayam. Heç vaxt ailə həyatı qurmamışam.

“Boşanmaqdan qorxduğum üçün ərə getməmişəm”

- Niyə təəssüf ki?

- Olsa, şad olardım, tezliklə toy edib ərə gedərdim (gülür). Kim istəməz ki? Qarşıma məni başa düşəcək biri çıxsa, ərə gedərəm. Başqa yolu seçmək fikrim yoxdu, əgər belə bir niyyətim olsa idi, 1-ci kursdan pis yola yönələrdim. Mənə normal ailə həyatı lazımdır. 28 yaşıma kimi boşanmaqdan qorxduğum üçün ərə getməmişəm. Qorxmuşam ki, seçimim yanlış ola bilər, övladla ortada qalaram, xoşbəxt ola bilmərəm. Ümid edirəm ki, mənim kimi subay xanımların qarşısına yaxşı bir insan çıxar.

“Axtarışda olsaydım yaxşı yerə ərə gedərdim”

- Tanınmış xanımlara kişilər xüsusi diqqət ayırır, onlara müxtəlif hədiyyələr göndərirlər. Sizdə belə bir hal baş verib?

- Olub, efirə çıxmamışdan öncə də diqqət mərkəzində olmuşam. Ancaq efir və TV-dən sonra artmağa başladı. Sadəcə olaraq ailə həyatı qurmaq istəyirdilər. Amma şərt irəli sürürlər ki, efirə çıxmayacaqsan. Hətta, çarşaba bürünməyimi istəyənlər də olub. Qarşıma çıxan kişilərin hamısı qısqanc olub. Mən heç vaxt axtarışda olmamışam, axtarışda olsaydım yaxşı yerə ərə gedərdim.

“Kişi tutmaq üçün efirdən istifadə etməsinlər”

- Xanımların əksəriyyəti pullu kişiylə tanış olmaq üçün TV və seriallara üz tuturlar. Bu məsələyə münasibətiniz necədir?

- Kişi tutmaq üçün efirə gələnlərə səslənirəm, xahiş edirəm bu sənəti ləkələməyin. Sənətdən öz məqsədləri üçün istifadə edirlər. Onlara görə bizim kimi sənətsevərlərin, təhsilli gənclərin adı batır. Kimlər nə işlə məşğul olur-olsun, mən heç kəsin şəxsi işinə qarışmıram, günahsız insan yoxdur. Amma efirdən istifadə etmək lazım deyil. Kimsə efirə çıxıb qiymət və reytinqlərini qaldırmaq istəyirlər. TV nümunədir, maarifləndirici işlər görmək lazımdır.