Qərb mətbuatı yazır ki, Rusiyanın başı Ukrayna müharibəsinə qarışıb. Azərbaycan da bundan istifadə edərək Qarabağda daha da möhkəmlənir. Türkiyə isə ciddi iqtisadi problemlərlə üzləşib. Ona görə də Qarabağla bağlı məsələlərə elə də müdaxilə etmir. Bundan istifadə edən Avropa İttifaqı və ABŞ Ermənistan-Azərbaycan münasibətlərinə daha dərindən nüfuz edirlər və Qarabağ probleminin həlli ilə bağlı ciddi fəallıq göstərirlər...
Əlbəttə, Rusiyanın başının qarışması çox yaxşıdır, ancaq Türkiyənin Cənubi Qafqazda xeyli passivləşməsi Azərbaycanın xeyrinə deyil. Düzdür, Türkiyədən ara-sıra Azərbaycanın müdafiəsi ilə bağlı bəyanatlar səslənir, ancaq bu bəyanatlar əvvəlki qədər etkili deyil.
Hazırda Azərbaycan Qərbin ermənipərəst dairələri ilə tək döyüşür. Türkiyə Azərbaycan üzərindən Cənubi Qafqaza daxil olub. Azərbaycanın zəifləməsi Türkiyənin bölgədən sıxışdırlması ilə nəticələnə bilər...
Ola bilər ki, məsələ mən dediyim qədər də kritik deyil. Ancaq Qərb mətbuatı havadan belə şeylər yazmaz. Zatən bu tendensiya onsuz da aydın görünür. Türkiyə, eləcə də bütövlükdə Türk Dünyası Qarabağ məsələsində Azərbaycanın yanında olmalıdır. Türk xalqlarının milli və dövlət maraqları bunu tələb edir...
Elbəyi Həsənli