Gələcəkdə Ukrayna müharibəsinə sülh yolu ilə həll tapmaq üçün aparılacaq danışıqlarda, NATO Baş katibi Ruttənin fikrincə, Kiyev ərazi itkilərinə hazır olmalıdır. “Hazırda nəzərə almalıyıq ki, Rusiya Ukrayna ərazilərinin bir hissəsinə nəzarət edir,” – deyə Rutte ABŞ-ın ABC News telekanalına bildirib.
Ərazi məsələlərində “de-fakto” və “de-yure” tanınma arasında fərq qoymağın vacib olduğunu qeyd edən Rutte eyni zamanda vurğulayıb ki, Ukrayna öz geosiyasi gələcəyini özü müəyyən edən suveren dövlətdir.
Cümə günü ABŞ Prezidenti Tramp və Rusiya Prezidenti Putin Alyaskada görüşməyi planlaşdırır. Tramp artıq Rusiya ilə Ukrayna arasında “ərazi mübadiləsi” ideyasını gündəmə gətirib, lakin bunu ətraflı izah etməyib. Ukrayna Prezidenti Zelenski isə ərazilərin Rusiyaya verilməsini istisna edib.
Zelenski danışıqlara daxil edilməsini tələb edir
Zelenski, atəşkəs ilə bağlı aparılan danışıqlarda ölkəsinin fəal rol almasını tələb edib. “Ukraynanı maraqlandıran hər bir məsələ onun iştirakı ilə qərara alınmalıdır,” – deyə o, axşam video-müraciətində bildirib. Zelenski Putinin aldatma cəhdləri barədə xəbərdarlıq edib və ABŞ-a müraciət edərək Rusiyaya qarşı əlavə sanksiyalarla təzyiq göstərməyə çağırıb. Oxşar mövqeni ARD televiziya kanalında Almaniya Kansleri Merz də ifadə edib: Zelenski danışıqlara daxil edilməlidir.
Keçmiş Almaniya səfiri ABŞ-ı tənqid edir
Almaniyanın Moskvadakı keçmiş səfiri von Fritsch ABŞ-ın diplomatik yanaşmasını tənqid edib. Onun sözlərinə görə, ərazilərin verilməsi beynəlxalq hüququn mövcud qaydalarından faciəvi imtina deməkdir. “Belə variantların əvvəlcədən ictimaiyyətə açıqlanması ABŞ diplomatiyasının zəif keyfiyyətini göstərir,” – deyə von Fritsch Deutschlandfunk radiosuna bildirib. O əlavə edib ki, Putin bu variantları qəbul edəcək və daha çox şey əldə etməyə çalışacaq. Von Fritsch vurğulayıb ki, Putinin “Axilles dabanı” onun iqtisadi və maliyyə zəifliyidir. Qərb birgə hərəkət edərsə, Rusiya prezidentini imkanlarının sərhədinə qədər sıxışdırmaq olar.
Aİ xarici işlər nazirləri mövqelərini uyğunlaşdırır
Aİ üzv ölkələrinin xarici işlər nazirləri bu gün videokonfrans formatında Ukraynanın gələcəyi ilə bağlı mövqelərini uyğunlaşdırmaq üçün görüşəcəklər. Xüsusi iclası, növbəti addımları müzakirə etmək məqsədilə, Aİ-nin xarici işlər üzrə ali nümayəndəsi Kallas çağırıb. O, əvvəlcədən bildirib ki, Avropanın əsas maraqları təhlükə altındadır və məsələ təkcə Ukraynanın deyil, bütün qitənin təhlükəsizliyi ilə bağlıdır. Kallas vurğulayıb ki, Moskvanın təcavüzü mükafatlandırılmamalıdır və Rusiya tərəfindən işğal olunmuş ərazilər Ukraynaya məxsusdur. Bu kontekstdə o, ABŞ-a müraciət edərək Rusiyanı ciddi danışıqlara məcbur etməyə çağırıb.
Bu xəbər Deutschlandfunk proqramında 11.08.2025 tarixində yayımlanıb.
Sarvan Səmədoğlu
TEREF