Mövlud Mərd Altındaş oktyabr ayında internetdə kimin foto və məlumatlarını axtarıb?

Rusiyanın Türkiyədəki səfiri Andrey Karlovun sui-qəsdi ilə bağlı aparılan istintaqda yeni detallar ortaya çıxıb.

Musavat.com Türkiyə mətbuatına istinadən xəbər verir ki, istintaq çərçivəsində qatil Mövlud Mərd Altındaşın birlikdə qaldığı dostu, vəkil Serkan Ö.nün kompüteri də araşdırılıb.

Araşdırma zamanı məlum olub ki, 2016-cı ilin oktyabr ayında vəkil Serkan Ö.nün kompüterindən bir neçə dəfə Karlovla bağlı internetdə axtarış aparılıb, fotoları, çıxışları tapılıb və bunlar incələnib. Bu isə qatilin qətllə bağlı öncədən xeyli hazırlıqlı olduğunu sübuta yetirən məqamdır. O, səfirlə bağlı ən incə detalı belə gözdən qaçırmamağa çalışıb.

Bundan başqa, Altındaşın hazırda həbsdə olan, Çevik Qüvvət Şöbə Müdirliyində vəzifə başında olan daha bir dostu, (o da onunla eyni evdə qalıb) polis məmuru Sercan B. isə istintaqa ifadəsində FETÖ ilə əlaqələrini rədd edib. Amma Sercan B.nin 17 iyul 2016-cı ildə ailə qurduğu həyat yoldaşının dayısının FETÖ-nun “evləndirmə imamı” olduğu iddia edilib. İndiyə qədər sözügedən qətllə bağlı aparılan istintaq çərçivəsində 9 nəfər həbs edilb.