Xəbər verdiyimiz kimi, dünən Bakının Səbail rayonunda 3 nəfərin xəsarət alması ilə nəticələnən yol-nəqliyyat hadisəsi baş verib.
Parlament prospektində 2 avtomobilin toqquşması nəticəsində 1995-ci il təvəllüdlü Cəfərzadə Samir Şahid oğlu və daha iki xanım xəsarət alaraq xəstəxanaya yerləşdirilib. Yaralanan şəxslər Azərbaycan Televiziyasının (AzTV) əməkdaşları olub.
AzTV-nin sosial media və ictimaiyyətlə əlaqələr şöbəsinin rəhbəri Mübariz Aslanov “Yeni Sabah”a açıqlamasında yaralıların vəziyyətinin normal olduğunu bildirib:
“Vəziyyətləri normaldır, bir nəfər xəsarət almışdı, onun da vəziyyəti yaxşılaşır. Samir Cəfərzadə hazırda xəstəxanadadır. Digər iki xanım (Əzizova Aytac, Talıbova Səbinə) xəsarət almayıb və onların vəziyyəti yaxşıdır. S.Cəfərzadə isə ya bu gün, ya da sabah evə buraxılacaq”.