“Microsoft” 2025–2028-ci illərdə Böyük Britaniyada süni intellekt infrastrukturu və əməliyyatlar üçün 22 milyard funt sterlinq (təxminən 30 milyard dollar) sərmayə qoyacaq.
Şirkət “Nscale” ilə əməkdaşlıq edərək 23 min qabaqcıl GPU ilə ölkənin ən böyük AI superkompüterini qurmağı planlaşdırır.

Sərmayənin 15 milyard dolları kapital xərclərinə, qalan hissəsi isə əməliyyatların genişləndirilməsinə yönələcək. “Microsoft”un vitse-prezidenti Bred Smit bu sərmayənin, ölkədə son günlər texnologiya sahəsində açıqlanan investisiyaların üçdə ikisindən çoxunu təşkil etdiyini bildirib.

Layihə ABŞ prezidenti Donald Trampın Londona dövlət səfəri ilə eyni vaxtda açıqlanıb. Bundan əvvəl “Google” da Böyük Britaniyada 6,8 milyard dollarlıq süni intellekt sərmayəsi elan etmişdi. “Microsoft”un sərmayəsi həm mövcud məlumat mərkəzlərinin gücləndirilməsini, həm də yeni mərkəzlərin qurulmasını nəzərdə tutur.