Çində kasıb ailədə böyümüş və “Macdonalds” restoranında aşbaz işləmiş gənc “Binance” kriptovalyuta birjasını quraraq cəmi 5 ilə 100 milyard dollar sərvətə sahib olub.
Teref.az virtualaz.org-a istinadən xəbər verir ki, bu sür sürətlə varlanan Çenpen Çjao Mark Zukeberq və Larri Peyc kimi İT-maqnatlara meydan oxuyur, lakin o tipik milyarder həyatı yaşamır. Kriptovalyuta sənayesinin ən sirli nümayəndələrindən biridir, daşınmaz əmlakı və bahalı avtomobilləri yoxdur, dəbdəbəli saatlar taxmır. Habelə o publika qarşısında görünməyi xoşlamır, Çjaonun həm şəxsi həyatı, həm biznesi sirr pərdəsi ilə örtülüb.

“Binance” kriptovalyuta birjasının 8 milyondan çox istifadəçisi var və o, dünya səviyyəsində treydinq platforması hesab edilir.

Çenpen Çjao Çin əsilli kanadalıdır, o 1977-ci ildə Çinin Szyansu əyalətində universitet müəlliminin ailəsində anadan olub. 1980-ci illərdə onun atası Çində Mao Tszedunun başlatdığı “mədəni inqilab” zamanı təqib olunub və ailə Kanadaya mühacirət edib. Çjaonun ailəsi Kanadada da kasıb yaşayıb, o ailəsinə kömək etmək üçün hər cür işlərdə işləyib. Bir vaxtlar Çjao gündüzlər “Macdonalds” restoranında burqerlər hazırlayır, gecələr isə yanacaqdoldurma məntəqəsində işləyirdi.

12 yaşı olanda atası ona 5,6 min dollara IBM PC XT 286 kompüterini alıb. “O zaman həmin pulu biz böyük əziyyətlə toplamışdıq. Atam deyirdi ki, bu kompüter onun həyatı boyu aldığı ən bahalı əşyadır”,-Çjao bir vaxtlar deyirdi.

Bu kompüter sayəsində Çjao proqramlaşdırmanı öyrənməyə başlayıb, ali məktəbə daxil olub və fərdi kompüterlər istehsal edən şirkətdə işləməyə başlayıb.

Çjaonun kriptovalyuta ilə tanışlığı 2013-cü ildə BTC China kriptobirjasının baş direktoru Bobbi Li və kriptoinvestor Ron Tsao ilə dostyana poker oynayarkən tanış olub. Tanışları ona təklif ediblər ki, riskə getsin və qənaət etdiyi pulların onda birini bitkoinlərə yatırsın. “Onlar dedilər ki, sən öz pulunun 10 faizini bitkoinə yatırmalısan. Əgər bitkoinin qiyməti sıfra düşsə sən həmin 10 faizi itirəcəksən, bu da çox az puldur. Amma böyük ehtimalla bitkoinin qiyməti 10 dəfə bahalaşacaq və sənin sərvətin ikiyə qatlanacaq. Mən düşündüm-bu doğrudan da ciddi təklifdir”,-Çjao bildirir.

Çjao birjanı 2017-ci ildə investorlardan 15 milyon dollarlıq kriptovalyuta cəlb etməklə qurub. O vaxtdan bəri onun sərvəti 100 milyard dollara yaxınlaşıb. “Binance” birjası offşorda qeydiyyatdan keçib, onun ofislərinin yeri məxfi saxlanılır, əməkdaşları isə bütün dünyaya səpələnib. Şirkətin səhmləri birjada satılmır və bütün bunlar “Binace” birjasını hökümətlərin hər hansı təzyiqlərindən qoruyur. Çjao dünyada ilk milyarderdir ki, ona təzyiq göstərmək mümkün deyil və sərvətləri durmadan artmaqdadır.