“Moskva” kreyserinin batmasında böyük ehtimalla ABŞ hərbçilərinin “əli”nin olduğuna dair məlumatlar getdikcə artmaqdadır. Görünən odur ki, onlar Qara dəniz donanmasının flaqmanı üçün əsl “ov” təşkil ediblər. Məsələ burasındadır ki, “Moskva” Qara dənizdə 300 km məsafədə hədəfləri aşkar etməyə qadir olan “S-300F” uzaqmənzilli hava hücumundan müdafiə sisteminə malik yeganə Rusiya gəmisidir. Bu, Odessaya hava yolu ilə hərbi texnika və silah daşınmasının qarşısını almaq üçün kifayət idi.

Pentaqon Ukraynanın xarici ticarətinin 70 faizini təşkil etdiyi Odessanın strateji əhəmiyyətini anlayır. Üç dəniz ticarət limanı, eləcə də cənubdakı ən böyük dəmiryolu qovşağı şəhəri hərbi planlaşdırma baxımından strateji əhəmiyyətli edir. Bundan əlavə, Sovet dövründə Odessa Hərbi Dairəsinin qərargahı burada yerləşirdi. SSRİ Silahlı Qüvvələrinin operativ-strateji ərazi birliyi indiki Odessa, Nikolaev, Xerson, Zaporojye vilayətlərinin ərazilərini, habelə Krım və müasir Moldovanı əhatə edirdi. Odessada şübhəsiz ki, həm Ukrayna Silahlı Qüvvələri, həm də milli batalyonlar tərəfindən istifadə edilən müvafiq hərbi infrastruktur hələ də mövcuddur.

Odessa həm də Dnestryanıya açılan qapıdır. Ukraynanın ən cənub bölgəsinin azad edilməsi Pridnestrovyeyə maddi, humanitar və lazım gələrsə hərbi-texniki yardımın göstərilməsini bərpa etməyə imkan verəcək. Və nəhayət, Odessadan bir qədər aralıda, xüsusən də Oçakov şəhərində NATO-nun dəniz bazaları üçün əlverişli limanlar var. Odessanın Ukrayna üçün qorunub saxlanması isə NATO-nun hərbi-dəniz gəmilərinin daim Qara dənizə səfər etməsinə və orada təlimlər keçirməsinə imkan verəcək. Bütün bu səbəblərə görə Pentaqon rəsmiləri Odessanı ön plana çıxarıblar və şəhərin Rusiyanın nəzarətinə keçməsinin qarşısını almaq üçün bütün güclərini səfərbər ediblər.

Bütün bu amillər Pentaqonun nə üçün ən yaxşı qüvvələrini kreyserə hücuma göndərdiyini izah edir. “Moskva” kreyseri əslində hava hücumundan müdafiə funksiyalarını yerinə yetirirdi. Kreyserin raketlərinin uçuş məsafəsi birbaşa Sevastopoldan Odessa vilayətinə zərbə endirməyə imkan verirdi. Odessaya doğru irəliləmə isə Moldovanın yarısına və Rumıniya sahillərinə nəzarət etmək deməkdir. Bunun baş verəcəyi təqdirdə isə Ukraynaya hərbi texnikanın təchizatında ciddi çətinliklərin yaranması qaçılmaz olacaqdı. Ona görə də, NATO ABŞ-la birlikdə kreyser üçün əsl “ov” təşkil etdi. Buna görə də, fevralın ortalarında (hətta müharibədən əvvəl) maksimum məxfiliklə müəyyən bir yük Odessaya çatdırıldı. Çox güman ki, bu yük Qərbin gəmi əleyhinə raketləri (ASM) idi. \\KONKRET.az