O, yeni iş həyatına başlayan biri kimi görünə bilər – lakin Rachel Gilmour (26) bütöv bir təyyarənin məsuliyyətini daşıyır! Britaniyalı qadın dünyanın ən gənc hava yolu kapitanı hesab olunur.
Cəmi 26 yaşında olan Rachel Şotlandiyanın Loganair hava yollarında təyyarə idarə edir. O, 2019-cu ildə dünyanın ən gənc kapitanı kimi tanınan Kate McWilliams ilə eyni yaşda bu mövqeyə çatıb. Rəsmi rekord vurub-vurmadığını isə demək çətindir.
Britaniyanın “Telegraph” qəzeti ilə müsahibəsində Rachel deyib: “İnsanlar rekordları və başlıqları sevir. Amma bir şey dəqiqdir: Mən dünyanın ən gənc kapitanlarından biriyəm.”
Universitet yox, səmalara uçmaq
Rachel hələ yeniyetmə yaşlarında universitetin ona uyğun olmadığını bilirdi. “Mən dinamik bir iş istəyirdim. Səyahət etməyi sevirəm və bilirdim ki, aviasiya mənim üçün ən uyğun sahədir.”
Lakin bir çox sərnişinlər onun həqiqətən kapitan olduğunu qəbul edə bilmir. Çox vaxt onu kabin heyətinin üzvü hesab edirlər. Onun bu barədə şərhi isə belədir: “Bu, sadəcə cinsiyyət stereotipləridir.”
Xüsusilə qış aylarında, uniformasını sviterin altında geyinəndə anlaşılmazlıqlar daha da artır. “O zaman kapitan olduğumu sadəcə görmürlər,” – deyə “Telegraph”a danışıb.
Dünyada pilotların cəmi 6%-i qadındır
Qlobal miqyasda pilotların cəmi 6%-i qadındır. Lakin bu nisbət artır. Britaniyanın Mülki Aviasiya İdarəsinə görə, 2019-2023-cü illər arasında qadın pilot lisenziyalarının sayı 26% artıb.
Rachel bilir ki, pilot olmaq üçün ciddi qətiyyət lazımdır. “İmtahanlar çox çətindir,” – deyə o bildirir. Üstəlik, pilot təhsili çox bahalıdır – təxminən 100.000 funt sterlinq (təxminən 120.000 avro).
Lakin Rachel daha fərqli bir yol seçib. Əvvəlcə şəxsi pilot lisenziyası alıb, daha sonra təcrübə toplayaraq pillə-pillə irəliləyib və nəhayət, kokpitin sol tərəfindəki kapitan kreslosuna əyləşib.
Səma onun evi kimidir
Rachel-in ən çox sevdiyi marşrut Glazqo – Stornovey xətti, hansı ki Xarici Hebrid adaları üzərindən keçir. “Açıq, günəşli bir gündə dəniz üzərində uçmaqdan gözəl heç nə yoxdur,” – deyə həvəslə danışır.
Son zamanlarda bu marşrutda ilk dəfə valideynlərini də uçuşa aparıb. O, bu anı belə təsvir edir: “Onlara tez-tez nə etdiyimi izah edirəm. Amma onlar bunu həqiqətən ancaq öz gözləri ilə görəndə dərk etdilər.”
Sarvan Səmədoğlu
TEREF