Günəş eynəkləri çoxdan sadəcə dəbli aksesuar olmaqdan çıxıb. Onlar gözlərimizi ultrabənövşəyi şüaların zərərli təsirindən qorumaqda çox mühüm rol oynayırlar. Lakin bütün günəş eynəkləri bu baxımdan eyni dərəcədə effektiv deyil.

News.ru-nun verdiyi məlumata görə, bu barədə rusiyalı oftalmoloq Anton Kazantsev xəbərdarlıq edib.

Onun sözlərinə görə, günəş eynəklərinin keyfiyyətini müəyyən edən əsas amil, ultrabənövşəyi şüalardan maksimum qorunmanı təmin edən "UV 400" markalanmasının olmasıdır.

"Təəssüf ki, büdcə seqmentində belə markalanması olan eynəklər tapmaq kifayət qədər çətindir. 400 nm dalğa uzunluğuna qədər bütün zərərli UVA və UVB şüalarını süzə bilən yüksəkkeyfiyyətli linzaların yaradılması xüsusi texnologiyalar və sertifikatlaşdırma tələb edir ki, bu da qaçılmaz olaraq məhsulun qiymətinə təsir göstərir".

Lazımi UV-qoruması olmayan ucuz günəş eynəklərini seçdikdə nə baş verir?

Kazantsevin sözlərinə görə, nəticələr çox ciddi ola bilər.

"UV-filtrləşdirməsi olmayan tündləşdirilmiş linzalar bəbəyi genişləndirir, nəticədə gözün torlu qişasına düşən ultrabənövşəyi şüaların axını artır. Bu isə öz növbəsində, katarakta və fotokeratit kimi xəstəliklərin inkişaf riskini artırır", - deyə həkim sözlərini yekunlaşdırıb.