İflasa uğramış fantastik “Xəzər adaları” layihəsinin müəllifi “Hacı” İbrahim Nehrəmli (İbrahimov) iddia edir ki, o, özünün brend geyimlərindən və saatlarından, hətta yas yerinə gedəndə başdan ayağa “Stefano Ricci”idən geyinməsindən bəhs edən müsahibə verməyib.
Xatırladaq ki, “Hacı” İbrahimin ƏTTÖKƏN açıqlamalarını ölkə.az saytı yayıb.Bu da mətbuatın ona Azərbaycan Beynəlxalq Bankına olan yüz milyonlarla dollar krediti qaytara bilməyən, fəhlələrə də borclu qalan iş adamının biznesinin çökdüyü bir vaxtda nədən borclarını qaytarmaqla məşğul olmayıb dəbdəbəyə pul xərclədiyini suaını ünvanlamasına səbəb olubb. Nehrəmlnin dedikləri habelə sosial şəbəkələrdə geniş rezonans doğurub.

Və bu gün “Hacı” İbrahim müsavat.com-a deyib ki, o, heç bir müsahibə verməyib və sayt müsahibəni “The New York Times” qəzetinin bir neçə il əvvəl barəsində yazdıqlarından götürüb, “yeni interpretasiyada” təqdim edib.

Sitat: “Əslində, heç mənim o müsahibədən xəbərim yoxdur. Onu haradansa götürüblər, o geyimləri də yazıblar. Mən iki ilə yaxındır xaricə getmirəm, ölkədən çıxışıma qadağa qoyulub. Xaricə getməmişəmsə, o brend paltarları haradan və necə almışam? Mən həmin saytın rəhbərliyi ilə əlaqə saxladım, onlar bu materialı “New York Times” qəzetində çıxmış müsahibəmdən götürüb, hazırlayıblar. Yeni formada veriblər”.

Nehrəmli gizlətmir ki, həmişə brend geyimlər geyinib, dəbdəbəli avtomobillər sürüb. Ancaq deyir ki, bizneslə məşğul olan biri kimi onun geyimləri müzakirə mövzusu olmalı deyildi.“Azərbaycanın ilk rəsmi biznesmenlərindənəm. Daxmada yaşayası deyiləm ki? Yaxud, ucuz paltar geyinməyəcəm ki?”- nehrəmli İbrahim deyir.
Virtualaz.org ölkə.az-la əlaqə saxlayıb, “Hacı” İbrahimin müsahibəsinin qurama olub-olmadığını dəqiqləşdirib. Saytın redaktoru Məmməd Gülməmmədov bildirdi ki, həmin müsahibəni onlara əməkdaşlardan biri təqdim edib. “Həmin müəllifin Hacı İbrahimlə yaxın əlaqələri, ünsiyyəti var. O, Hacı İbrahimlə söhbət edib, geyim zövqü barədə suallar verib və söhbət əsasında müsahibə hazırlayıb bizə təqdim edib. Həmin söhbətin lent yazısı da var, biz onu bəzi əlavə sualları çıxarıb redaktə edəndən sonra saytda yayacağıq”-M.Gülməmmədov müsahibənin qurama olduğu haqda deyilənləri təkzib edərək bildirib.

Qeyd edək ki, “The New York Times” bir neçə il əvvəl “Hacı” İbrahim və onun layihəsi barədə reklam xarakterli geniş məqalə dərc etmişdi. Ancaq həmin məqalədə Hacının indi geyimlər barədə dediklərinin heç biri yoxdur. Orada ümumi şəkildə qeyd olunur ki, iş adamı dəbdəbəli avtomobillərdə gəzir və brend geyimlər geyir.

Qeyd edək ki, “Hacı” İbrahimin öz dediklərini sonradan danması və ya unutması yeni hal deyil. Onun fantastik “Xəzər adaları” layihəsi ilə bağlı VƏDLƏRİNİ yada salmaq kifayətdir.