DİN Mətbuat Xidmətinin Quba regional qrupundan Teref.az -a verilən məlumata görə, Şabran Rayon Polis Şöbəsinin təşkilatçılığı ilə rayonun Vələsli kənd orta məktəbində “Narkomaniyaya yox deyək” mövzusunda maarifləndirici tədbir keçirilib.
Tədbirdə çıxış edən RPŞ-nin rəisi, polis polkovniki Məhəmməd İbrahimov gənclərə narkotik maddələrin insana fiziki və psixi zərərindən danışıb. O bildirib ki, həmin məddələrin alüdəçisinə çevrilən narkoman, bəlalarından qurtula bilmir, narkotik maddə almağa imkanı olmayanda isə cinayət törətməkdən belə çəkinmir. Belə hallar isə cəmiyyəti düşündürən ən vacib məsələlərdəndir. Onun üçün hər bir vətəndaş bu mövzuda diqqətli olmalı, narkotikanın yayılmasının qarşısının alınmasında fəal iştirak etməlidir.
Daha sonra çıxış edən RPŞ-nin TİQ-nun baş inspektoru, polis polkovnik-leytenantı Ramiz Teymurov və polis baş leytenantı Mübariz Zəkəryəyev erkən nigaha daxilolma və dini radikalizm mövzularında geniş çıxışlar ediblər. Yeniyetmə vaxtlarında qızların ailə qurmasını onların gələcəkdə fiziki və mənəvi sağlamlığı üçün ciddi təhlükə törətdiyini bildirən polislər, şagirdlərə əsasən təhsilə maraq göstərmələrini və gələcəyin yüksək ixtisaslı mütəxəssislər kimi yetişmələrinin önəmindən danışıblar.
Görüşün sonunda polis əməkdaşları məktəbliləri maraqlandıran sualları cavablandırıblar.